《小傳日記》日本由８月開始就已經宣布排放核廢水，至今已經排放咗兩次，中俄都先後宣
布禁止日本水產入口。而香港到目前為止仍然禁止緊日本十個都縣嘅水產入口，包括東京、福島
、千葉、栃木、茨城、群馬、宮城、新潟、長野同埼玉，而所有活生、冷凍、冷藏、乾製等等方
式保存都計算在內。
不過港人最愛嘅日本魚生三文魚，就未有影響，因為目前香港最大嘅三文魚進口地方都係挪
威，其次就係智利，真正來自日本嘅三文魚係非常之少，所以三文魚喺各大壽司餐廳依然照常發
售。
而華人地區都鍾意食嘅乾鮑就唔同，三大著名乾鮑：網鮑、吉品同禾麻都係來自日本。當中
吉品係產自岩手縣吉浜灣，所以就稱為「吉品」；另外禾麻就係來自青森縣，而網鮑原本就係千
葉縣比較出名，但好早就因為海水問題，而被青森縣爬頭，所以就避過一劫，三款鮑魚都可以繼
續供港。
日本乾鮑產業一向都係家族生意，做呢行嘅每家都有自己獨門秘方製作，絕對唔會外傳，而
呢個行規亦令到日本乾鮑至今都係中菜最推崇嘅選項。
不過除咗北半球嘅日本之外，遠至南半球之外一樣都有鮑魚供應，其中最出名就係澳洲同南
非。呢兩個產地比較常見都係急凍鮑魚，喺超市經常都可以見到有大過拳頭嘅青邊鮑，通常幾百
蚊都可以買到，價錢非常貼地。有新鮮亦都會有乾製，近年呢兩個地方都有出產乾鮑，可以話係
更加平價親民之選。雖然未必夠日本乾鮑嗰種溏心軟糯口感，不過價錢就平得多，普羅大眾都食
得到。
目前中日都仍然就水產出口拗手瓜之際，日本就堅持水產安全，最新Ｇ７仲不點名譴責禁運
日本水產嘅行為，要求撤銷禁令，而神州方面就經中國駐日本大使館回應指出Ｇ７「雙重標準」
，仲話經濟脅迫係「Ｇ７專利」。由食安問題上升為經濟議題，睇怕香港嘅水產禁令仲有排維持
，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
想要獨家投資理財Tips？即Like etnet 全新Facebook專頁► 立即讚好
