《小傳日記》ＪＰＥＸ屢勸不聽，逼到證監出手都唔驚？

　　《小傳日記》證監聯同警方針對ＪＰＥＸ嘅調查仍在進行，除咗林作同陳怡被拉，另外仲有
３男３女被捕，不過全部都獲准保釋候查，８個人都涉嫌串謀詐騙。不過而家網民最關心嘅正係
「流亡」馬拉嘅莊思敏，雖然警方噚日記者會上話有需要會引渡「逃犯」返來，不過莊思敏一於
少理，仲用「笑喊」ｅｍｏｊｉ回應網民質問，一啲都無懼有可能成為「逃犯」。
　　而逞強嘅都唔只莊小姐，仲有ＪＰＥＸ嘅回應都相當唔客氣。對於警方咁高調嘅指控，
ＪＰＥＸ就話證監同警方話佢哋已經停運嘅講法係嚴重誹謗，強調平台所有交易功能仍然正常運
作，現階段只係配合法例，逐步將理財項目等功能下架。ＪＰＥＸ又話一直都有同證監聯絡，並
唔係對方稱從未就申請事宜聯絡，又質疑點解只係針對ＪＰＥＸ平台。
　　其實今次高調拉人之前，證監都已經出過好多警告訊號，譬如早喺成年之前已經將ＪＰＥＸ
列入無牌公司及可疑網站名單，去到上個月初都特登再出過一篇聲明，不點名提到有某啲未獲發
牌嘅交易平台，訛稱已經同證監提交牌照申請，誤導公眾以為交易平台已經持牌，警告之後有可
能會唔發牌畀相關機構。不過據講當呢篇聲明出街之後，ＪＰＥＸ方面嘅宣傳推廣依然如常進行
，直頭當證監無到，唔知係咪因為咁就令到證監終於要出手來個下馬威。
　　而今次仲有一個重點，就係８個被捕人士都係以「串謀詐騙」被拉，好多人都疑問點解唔用
洗黑錢條例，以至係上年新修訂、反洗錢條例裏面有關虛擬資產相關罪行。有意見就覺得，對於
正係鼓勵虛擬資產交易嘅港府來講，雖然有例可依，不過如果開創先例用新例來告ＪＰＥＸ無牌
經營，就會令其他所有Ｃｒｙｐｔｏ交易平台都陷入喺香港無牌經營嘅尷尬位置。而且目前所以
有８個被捕人士都唔係ＪＰＥＸ負責人，疑似係唔想太針對Ｃｒｙｐｔｏ交易平台有關，所以就
先拉部分涉案員工，暫時都未有負責人被拉。
　　雖然目前證監同警方將ＪＰＥＸ案定性為「串謀詐騙」，不過目前一直講嘅「１２億銀騙局
」，有大部分錢都只係砸咗喺ＪＰＥＸ平台入面，並唔係已經被消失咗，所以係咪真係「騙」都
仲要睇事態發展同調查，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。