《小傳日記》食住國貨熱潮，小米１４十一月提早出鞘！

　　《小傳日記》繼噚日蘋果出完最新ｉｐｈｏｎｅ　１５，小米（０１８１０）就公布將會喺
１１月初出小米１４。多間內媒報道，小米１４將會對標ｉＰｈｏｎｅ　１５　Ｐｒｏ╱
ＰｒｏＭａｘ，即係指名道姓要同ｉＰｈｏｎｅ高端版對撼，而唔係普通版。消息又話，日前已
經開工量產，仲話今次小米手機嘅生產量比起舊年同期增加咗六成，確保一出就可以有大貨供應
。
　　由上年小米１３開始，小米就想改行高端路線。記得上年小米１３推出，一部機價錢都已經
拍得住一部ｉＰｈｏｎｅ，普遍孖屐反應都唔睇好，因為用同一價錢，個個都寧願買
ｉＰｈｏｎｅ好過小米。不過有網上評論就話，今次小米比起上年提前咗一個月發表新機，係因
為小米１３「大受歡迎」，９個月就達成銷售目標，所以今次趁勢加快產品周期。加上就係華為
Ｍａｔｅ　６０帶起咗國貨潮，小米於是就想食埋條水佢。
　　另外，有孖屐都提到，高通將會喺１０月底發表Ｓｎａｐｄｒａｇｏｎ　８　Ｇｅｎ　３處
理器，雖然有傳會令成本急升，不過據聞小米為咗小米１４成為第一部用新處理器嘅手機，所以
就提前發布搶頭啖湯。除咗用新處理器，有傳小米１４會用５０００萬像素主鏡頭，內置
４８６０ｍＡｈ電池，１４　Ｐｒｏ就會用到５０００ｍＡｈ電池。不過整體外型好似同小米
１３無乜分別，就咁睇就會比較似小米１３嘅加強版。
　　雷軍已經唔只一次提過小米要「對標」ｉＰｈｏｎｅ，上個月嘅演講入面又再提到，話當自
己第一次提出要對標ｉＰｈｏｎｅ，都係被人冷嘲熱諷，不過佢就堅持要對標ｉＰｈｏｎｅ，先
有機會「趕上」ｉＰｈｏｎｅ，甚至「超越」ｉＰｈｏｎｅ，所以，以後每次出新機都會強調一
次。所謂不進則退，ｉＰｈｏｎｅ都被人笑緊無乜新意，小米話唔定有一日真係可以「超越」
ｉＰｈｏｎｅ呢，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。