《小傳日記》房企逼入絕路，主席跪地兼用條命做擔保！

　　《小傳日記》碧桂園（０２００７）之前盈警出事之後，主席楊惠妍自己署名親自出咗篇道
歉聲明，先令大家知道原來一間公司蝕錢係會同公眾道歉。不過而家道歉都唔夠，有需要時仲要
跪低認錯！
　　曾經係百大房企嘅北京石榴集團，２０２１年試過挑戰喺魚缸掛牌，不過最終都係唔成功。
隨後公司愈撈愈霉，上年只係賺得４８８４萬銀人仔。去到今年６月就開始有戲睇，主席崔巍忽
然出ｍｅｍｏ，話副主席已經離職，而其後桑春華就回應指自己係「被離職」，隨後呢兩三個月
以來兩位正副主席都一直明爭暗鬥。
　　去到今個月初，桑春華忽然被傳桃色醜聞，被實名舉報以飯局為名，實則約玩「多Ｐ派對」
，投資公司雲核變量嘅女ＣＥＯ劉夏拒絕應約之後，就被桑春華分別以微信同電話辱駡，劉夏於
是就以實名喺微博公布雙方對話內容，到而家桑春華都仲係潛水當中。
　　而呢段時間，已經有金融機構發函通知石榴，如果唔拆掂高層分歧，就有機會將集團嘅全部
貸款提前到期。於是乎剩低嘅主席崔巍就搞咗記招交代。會上崔巍聲淚俱下，當提到股東內鬨，
更加情緒激動兼跪地同傳媒講，如果淨資產覆蓋不足而為各間金融機構帶來真實損失，佢就會由
公司大樓２２樓跳落去，用自己條命嚟做信譽擔保咁話，仲話唔想公司係「死於一場無妄的輿情
之災」。
　　用到情緒勒索呢一招，可以見到石榴集團已經得返「最後一粒核」，先會用到咁嘅屎橋。不
過數還數，問題都係要解決，呢啲方法都只能拖得一時，不如實際啲同債主傾掂佢啦，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。