《小傳日記》豐洲市場吞拿魚大跌價！益咗歐美東南亞？

　　《小傳日記》自從上星期五日本正式將核污水排海，神州同香港都分別禁止來自日本各地嘅
水產，先唔講對環境影響，單係本港同內地嘅禁令就已經重創東洋漁業。
　　彭博報道，神州係日本最大嘅水產出口國，２０２２年嘅出口總值就達到８７１億円，當中
最多嘅就包括扇貝、吞拿魚、海膽、鯛魚同海參。報道引述東京都中央批發市場網站數據，２５
號當日嘅豐洲市場新鮮青森吞拿魚均價，較上個交易日急跌兩成四至每公斤９３８３円。有專門
出口海鮮到本港同內地嘅北海道水產公司就話，無得出口就要暫時閂門，仲要裁走２０個員工。
又有另一間水產貿易公司就話，無得對華出口海鮮，就唯有試吓ｓｅｌｌ去歐洲、美國同東南亞
。
　　同東亞地區唔同，歐盟早喺今個月３號就反其道而行，率先取消對日本食品嘅進口限制。原
來２０１１年爆發福島第一核電站事件以來，就已經有５５個國家同地區對日本漁農產品實施進
口限制，到今年為止，歐盟、挪威、瑞士、冰島、俄羅斯等７個國家同地區，仲要求由福島縣等
個別地區進口漁農產品，要提供放射性物質檢驗證明先可以進口。歐盟今個月就正式取消限制。
　　上次都講過，日本東電強調排出海嘅含氚量比起標準更低，而日本排核污水之後，韓國海洋
水產部公布對３個海域進行嘅首次輻射污染檢測結果顯示，韓國海域中銫同氚嘅濃度都遠低於世
衛飲用水標準。如今檢測結果都合格，不過本港同內地幾時會取消禁令就真係未知。環境局謝局
長就建議禁令期間，餐廳可以多主動轉用來自神州嘅優質水產，今次神州漁業市場仲唔得米？請
請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。