《小傳日記》證監會噚日出聲明，話觀察到某啲未獲發牌嘅虛擬資產交易平台使用不當嘅經
營手法，訛稱已經同證監提交牌照申請，話呢啲失實而又誤導嘅聲稱會令公眾誤以為個交易平台
係符合證監會嘅監管規定。
證監又話，目前只係提供緊喺規管虛擬資產服務提供者新制度下嘅過渡安排，如果有人以為
自己合資格喺過渡安排下被當作為獲發牌，即使係咁，證監之後都可以有權拒絕發牌畀佢哋。
不過證監咁好眼力「觀察到」有平台未有牌就以為自己有牌，唔知又觀唔觀察到惠陶集團
（８２３８）噚日暴跌咗九成七。九成七都已經可以話差唔多「歸零Ｇｏ」，比起３月開始抽升
嗰排都仲要跌多咗。
其實魚缸間唔時都會有股份忽然遭洗倉，但係只有少數最後發現係有人背後操盤，譬如早排
就好高調咁拉咗堆微信女，然後就無然後。而到今日為止惠陶都未出返份通告解釋點解暴跌九成
七，連「公司不知悉股價波動原因」都未有，反而就有份通告話將會喺８月１５號開董事會會議
審議通過中期業績嘅會議。
雖然身為投資者都有責任小心誤墮妖股陷阱，雖然證監高調地拉咗一班微信女，不過
ＷｈａｔｓＡｐｐ都仲係成日有「老師ｇｒｏｕｐ」指點人買邊隻邊隻股，唔知證監幾時會好眼
力到捉到多幾個疑似唱高散貨嘅主腦呢？請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇？】以伊衝突升級，北韓派兵增援俄羅斯，你會否擔心世界發生大規模戰爭？► 立即投票
