《小傳日記》ＢＹＤ法務部開微博，話博主惡意詆毀證據確鑿！

　　《小傳日記》ＢＹＤ（０１２１１）身為大藍籌，連公司部門都有自己微博。ＢＹＤ法務部
官方微博正式成立，開門第一炮就公布，已經正式起訴微博博主「龍豬－集車」。
　　ＢＹＤ法務部就話，「龍豬－集車」長期發布大量不實信息，惡意詆毀、貶低侮辱ＢＹＤ，
對品牌聲譽造成嚴重損害，所以就正式起訴「龍豬－集車」，要求佢刪除侵權言論、公開道歉兼
賠５００萬人仔。
　　「龍豬－集車」就係喺微博活躍嘅汽車ＫＯＬ，平時主要博文都係講車為主。而龍豬－集車
原來早喺６月已經被微博禁言，據帖文入面其他用戶留言來睇，龍豬－集車近期主要都係唱好緊
造車新勢力之一嘅魏牌新出嘅藍山，但係就應該平時成日都會出一啲不利ＢＹＤ同長汽
（０２３３３）嘅消息。其中６月底就出過一張ＢＹＤ車喺路中心停低嘅相，來瘀ＢＹＤ嘅造車
質素。
　　睇返呢個Ｐｏｓｔ下面嘅留言，都唔係一面倒一齊笑ＢＹＤ，都有人為ＢＹＤ講兩句，問龍
豬－集車究竟係有幾想造低ＢＹＤ。因為疑似龍豬－集車一向都係吹奏魏牌為主，都有人覺得佢
係魏牌打手所以成日要出ＢＹＤ同長汽嘅黑材料。仲有人提到，其實張相都已經係舊相。
　　不過如果真係被人搵到咁多黑材料，係咁ＢＹＤ都要注意下，雖然龍豬－集車微博入面都不
乏支持ＢＹＤ嘅人，不過都有人講到有關ＢＹＤ電池、車輪等等嘅問題，甚至有人提到買完
ＢＹＤ投訴無門，所以都真係應該要留意。
　　而ＢＹＤ法務部都呼籲，如果有網友搵到其他涉嫌侵權、涉嫌收受他人利益侵害ＢＹＤ權益
嘅信息，經ＢＹＤ查證屬實並得到相關司法機關認可，ＢＹＤ仲會按價值提供５萬至５００萬人
仔嘅獎金。而今次都係神州新能源車競爭激烈嘅其中一次事件，已經上到揭黑材料地步，發改委
先啱啱出完措施希望穩定和擴大汽車消費，太黑材料互揭都唔係做大個餅嘅好方法，都難怪
ＢＹＤ要開始揸正來做，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。