《小傳日記》紐頓縮沙仲嘔血！恒大汽車命不該絕？

　　小犬雖然叫「小犬」，不過殺到埋身就發覺實際上係比預期勁，仲掛埋9號波同黑雨，不過最終商經局轄下天文台最終喺12點落曬黑雨同8號波，魚缸成功爭取開到唔夠半日市！
　　有得開市就有得沽貨走人。繼上星期恒大(03333)同恒大物業(06666)復牌之後，恒大汽車(00708)今日都終復牌，不過就宣布紐頓暫停認購。恒汽9月29號接獲紐頓函件，話鑑於中國恒大發生嘅「一系列變化」，具有重大不確定性，亦對股份認購協議帶來重大不確定性，所以而家就會暫停履行股份認購協議中的相關義務，恒汽最終今日就要跌9巴仙。
　　不過恒汽就強調，「暫停」並唔係代表「終止」，話認購方確認該函並唔構成終止股份認購協議嘅通知，所以恒汽就回應紐頓方面話有意願同對方就調整交易方案重新談判。即係未死得曬，恒馳仲有彎轉。不過好大可能係紐頓已經洗濕咗個頭，想走都走唔到。恒汽8月中公布將會獲紐頓以39億美元注資認購新股，如果交易完成，紐頓將會持有27.5%恒大汽車股權，成為單一最大股東，即係已經收購咗恒大汽車。
　　紐頓據報由阿聯酋國家主權基金持股嘅電動車公司，係第一間亦係目前唯一一間喺美國上市嘅阿聯酋電動車公司，目前喺神州都未正式有電動車上市。不過有報道就提到，紐頓董事長係中國籍嘅吳楠，而公司多位高層都好有可能係同胞，所以其實紐頓好有可能只係一間具有阿聯酋資金背景嘅神州電動車公司。而因為紐頓仲未正式發展神州市場，收購恒汽可能都係近乎於「買殼」，以恒大汽車個名來將紐頓引入。
　　至於點解紐頓想縮沙唔得，因為8月中除咗公布咗紐頓計劃認購新股之外，內媒《財聯社》報道，紐頓對恒汽仲有「首筆5億美元戰略投資」，另外仲有6億銀人仔嘅過渡資金已經喺8月中過數，前後兩次都已經科水差唔多50億人仔，如果縮沙就會石沉大海，所以只可以暫停，「終止」反而會兩敗俱傷，所以邊有得走？請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。