《小傳日記》概念當道乘機亂炒古仔，大眾公用爆升當局者迷？

　　投資要靠概念，過去有「Dot Com」同「中」字概念，到依家百花齊放，咩元宇宙概念、蘋果概念、比特幣概念、AI概念、特朗普概念，總之炒得起個股價就乜都可以套落去，即係同拍戲一樣，一個正常人嘅正常生活冇咩特別，但套個外星人概念落去就唔同，地球上所有事物，對外星人嚟講就好唔正常。好似「宇宙大王」咁，佢點都唔理解，人類個廢物排出口喺下面，對佢嚟講，唔係應該係頭頂先至正常呢！
　　股市周不時都有啲唔知點解會爆升嘅股票。好似隻大眾公用(01635)咁，今日最多爆升超過49%，但原來過去兩個交易日已經靜靜起革命，由上星期三收市價1.18銀，升到今日最高1.91銀，升幅62%。大眾公用A股(滬:600635)截至半日收市已經連續三日漲停。因咩解究呢？
　　原來據報大眾公用近日通過旗下公司成立上海眾益同享供應鏈有限公司，註冊資本為1000萬元人仔，業務包括智能機器人銷售、集成電路銷售、集成電路晶片及產品銷售，以及廣播影視設備銷售等，更加話升浪可能同無人駕駛熱潮有關。
　　睇番資料，大眾公用主要喺內地從事管道燃氣供應、污水處理、公共基礎設施項目、運輸服務及投資金融服務。當然，無人規定佢唔可以從事其他種類業務，而且仲係通過旗下公司進行。股價反應咁大，梗係啦，又智能機器人，又晶片，仲有無人駕駛，哇，佢好似玩曬成個科技業咁喎！散仔見到「晶片」兩個字，即時令人聯想到英偉達啦！晶片喎，主導世界嘅未來，點可以唔升？但係公司今日就發通告，話唔知股價波動原因，尤其7月10號仲發盈警，唔通真係旁觀者清，當局者迷？！
　　不過，分析落去，就算單嘢堅嘅，佢只係純粹作為銷售商「賣」產品，又唔係「造」，攞到高端產品獨家銷售代理先至有古講，否則，咁樣急升法遲早跌番曬，食少多覺瞓，當睇戲算啦！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。