08/05/2018
【職場心理學】做事拖拉是一種病?向拖延症說不!
明明應該專心處理工作,但做做吓,唔知點解就會好自然咁走咗去碌Facebook、上網睇吓八卦新聞,又或者同隔離位同事搲水吹……結果搞到本來可能只需要兩個鐘就做完嘅工作,最後做咗成個下晝都做唔完。
心理學家話,呢類人好大機會係「拖延症患者」。
好多人以為拖延症只係人做事唔專心,兼臨急抱佛腳嘅表現,但其實養成拖延症嘅背後原因係──人下意識會揀比較舒服嘅路嚟行!所以一遇到唔鍾意、做得唔順利嘅事情,就會有分心嘅情況出現,甚至會用唔同嘅藉口嚟解釋自己嘅行徑……
1. 「我而家冇做呢件事嘅心情!」
當人覺得自己好累、好餓,或者好有壓力嘅時候,好容易會理所當然咁畀藉口自己「拖住先~陣間先做啦~有mood個陣再做。」雖然某程度嚟講,咁樣的確可以畀自己放鬆吓,但要小心鬆過頭會造成進度無限期落後。
2. 「好易啫!我三兩吓手勢好快就會搞掂!」
有時錯誤估算工作嘅難易度亦都係造成拖延嘅原因!諗住做計劃書只係簡單解釋吓自己嘅構思理念、引用返過去一兩年嘅數據,然後繪影繪聲咁解說一返就ok?殊不知當腦細問起市場環境變動、競爭對手嘅動向、消費者嘅需要等資訊嘅時候就口啞啞。畢業有啲嘢並唔係靠小聰明就可以拆得掂,而係需要實實在在咁花時間去預備。
(「YO!駛乜驚吖!」──《西遊記》劇照)
3. 「太難啦,我真係做唔嚟!」
恐懼,絕對係會令件事睇起嚟比實際狀況嚴重,好多人甚至因為咁而踏出第一步都唔願意。
4. 「我覺得我可以再做好啲!」
怕失敗所以唔敢做,絕對可以理解;但原來過份追求完美,一樣會造成拖延!呢類人通常都係好介意其他人嘅眼光,好擔心自己做得唔好會被人笑、被人睇唔起,所以一味拖字訣,唔到最後一刻都唔交貨。
唔知你有冇搵到自己嘅影子呢?其實要解決拖延症,一啲都唔難(當然都要有決心先啦!),就等小編即刻醒你幾招!
1. 寫To-do list
寫一張To-do list,將工作按緊急度及重要性分類(即「緊急又重要」、「緊急但唔重要」、「重要但唔緊急」和「唔緊急又唔重要」呢四種),並清楚排列出來,提醒自己要先做好甚麼。
(《命中注定我愛你》劇照)
2. 分拆工作項目
將複雜嘅工作項目分拆為簡單嘅「小任務」,而每當完成咗一個小任務後,就畀自己放鬆抖一抖,休息過後就可以繼續做下一個小任務;同時按部就班咁去完成所有任務,可減少心理負擔和壓力。
3. 設定任務完成時間
設定一個工作時段,如30分鐘,然後話畀自己知喺嗰段時間內,必須專注眼前嘅工作,唔可以有任何藉口推脫,直到該時段完結為止。當30分鐘過去後,可以畀自己休息一陣,再設定下一個30分鐘嘅工作時段。
想知自己有冇「工作拖延症」?即轉去下一頁檢測吓啦~
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票