街頭騙案年年都有，而且愈來愈新、愈來愈多花款，究竟你又遇到邊幾款？原來騙案隨時隨地都可以發生，所以【騙局大拆解】一連三集，同你剖析騙局。

假和尚真騙徒，呃人善心

　　如果有留心，喺深水埗北河街，或者土瓜灣旺角就成日見到有批「和尚」，成日坐喺地下擺檔，通常都係賣吓啲開光佛珠；不過近期有班和尚成日喺街「化緣」——其實係問途人拎錢。有好多街坊都覺得畀十蚊八蚊，都係出於自己嘅善心，無傷大雅，特別有信佛嘅佛教徒，覺得自己被人呃都無所謂，呃極都係一百幾十。

　　但其實根據「佛門警訊」創辦人翁靜晶所講，佛教其實有戒律講明，修行法師係唔可以做買賣，佛缽只可以收食物不可收錢。假如佢同你講可以擺咩風水陣就假上加假啦，佛門同風水大纜都扯唔埋。如果真係想添香油錢，不如認認真真去佛寺參拜，然後再親自放落香油箱，成件事誠心好多。

撰文：李皆穎