• |
  • 極速報價
  • |
  • 會員
  • 產品服務 / 串流版
  • 設定

26/06/2020

《Make Money》一萬蚊,點樣保本又增值?保守的你…GO!

  • 加入最愛專欄
  • 收藏文章

  大家係咪已經喺6月21日秒速登記咗拎取一萬蚊呢?筆錢最快7月8日到手。筆者上一篇同大家「些牙」過一萬蚊點煲大好,不過就適合大膽投資嘅人,如果保守型嘅人,一萬蚊又可以點樣操作呢?其實都仲有好多玩法,蠅頭小利都係錢!

 

(Shutterstock圖片)

 

經銀行申請優惠不同,抽獎定拎現錢好?

 

(Shutterstock圖片)

  

  間間銀行都爭住幫你拎一萬,呢個又話送抽獎,嗰個又話送現錢,究竟應該點樣揀?關鍵在於:你有幾大機會拎到上手。幾萬甚至幾十萬人爭嗰百幾份禮品,真係難過登天,如果自問無咩抽獎運就不如拎啲實際嘢仲好,起碼現兜兜放落自己袋啦!

 

  好似有啲銀行經其申請,即送幾十蚊現金,無形中賺餐M記,起碼實實在在袋落袋;有啲銀行如果新開帳戶,經其收取一萬蚊,就可以有3個月定存年利率4﹒3%優惠,如果存夠10萬,就可以收到息1075蚊,可謂十分穩陣。

 

  當然啦,你想拎去抽獎都無咩所謂,祝你好運!

 

iBond2020推出,入場費一萬即可

 

(Shutterstock圖片)

 

  政府推出嘅iBond簡直就係抗通脹神器,早係2011至2016年出過六次,年期三年,每半年派息一次,而利率同通脹掛鈎,而且設有最低息率(1厘)。今年財爺份財政報告已經講過過再度發行,發行額度大約100億港元左右。

 

  iBond一直被譽為「穩賺之選」,因為保底利率簡直無得輸!根據過往經驗,債券每手入場費為1萬蚊,相信今次都會跟隨,而且過往iBond試過最高都6厘息,最低都有1﹒02厘。重點係,如果突然等錢用又可以喺市場沽售套現,真係爽歪歪;如果你係Senior仲可以買「銀色債券」,過往經驗年息不少於3厘!

 

實體黃金可保值,買金幣升值潛力高

 

(Shutterstock圖片)

 

  黃金一路都被投資者認為係避險之選,但都要分清楚究竟買「紙黃金」定「實體金」。所謂「紙黃金」,唔涉及實體黃金交易,買賣之間只涉及合約,所以就叫「紙黃金」,雖然現貨金價近期都上高位,但由於波動性頗大,隨時贏粒糖輸間廠。

 

  實體黃金,即係買金牌、金條等等,本港喺婚嫁、飾品上都有固定需求,畢竟今年「雙春兼閏月」,之前疫情嚴峻唔敢郁,但而家疫情緩和,好多人都趕住結婚,所以好多金舖嘅實體金需求大增。銀行本身都有提供金條或者金牌買賣服務,入場費由二千幾都萬六蚊都有,視乎實金重量,豐儉由人,而且部分紀念金幣升值潛力頗高,放佢十年八載等升值又得,得閒拎出嚟閃吓又得。

 

月供股票開倉基金,一萬蚊夠供幾個月

 

(Shutterstock圖片)

 

  買賣股票的話,一萬蚊確實到喉唔到肺,但月供股票可以將買入成本降低,從而分散風險,等自己有好嘅儲錢習慣。趁而家大市仲喺低位,一萬蚊算係幫我自己整個開倉基金,每月供兩三千蚊左右,變相降低自己入場成本。

 

  當然啦,買乜股先係重點。過往唔少基金經理都推介盈富基金(02800),因為佢同大市掛鈎,波幅唔大而且增長穩定。不過仲有好多選擇,例如目前唔少公用股如煤氣(00003),而家煤氣大約12蚊,一手萬二蚊,補小小買返一手,等佢「財息兼收」;想進取小小可以考慮新經濟股,月供小米(01810)、美團(03690)、阿里巴巴(09988)等等,始終未來都係高科技嘅時代,點可以睇少佢哋增長動力呢?唉唷,我明明係講保守型㗎!

 

撰文:李皆穎

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

我要回應

你可能感興趣

放大顯示
風水蔣知識

職場新常態

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ