每年到了4月就知道兒童節或復活節來臨。現今小朋友每星期課餘時參加不同興趣班，目的是想利用課餘時間增進知識。另有家長們就利用假期，與囝囡一齊參與親子活動。韋太會一連四星期教授一些小食，家長們可以趁假期或假日與囝囡進行親子活動啦！

　　今期教授芝麻湯丸，連餡料都係自家製，絕無防腐劑，甜味由自己操控。做多左的湯丸又可以放入冰格冷藏，隨時想吃就吃，真方便。

烹煮時間： 10分鐘

份量： 12 粒

材料： 

糯米粉   120 克

清水     105 克

芝麻餡料： （入袋冰硬）

已烘黑芝麻   40克

砂糖         40 克

牛油 （溶）  30 克

薑湯糖水： 

清水       500 毫升

片糖       1條 （約80克）

老薑       1小舊 （約：80克） 

做法： 

　　1. 將清水加入糯米粉內，慢慢搓揉成粉糰，如太乾，可以加入少許清水，搓揉至軟身，放室溫30分鐘待用。

　　2. 將芝麻粉攪碎，加入砂糖混合，加入牛油搓勻，放入保鮮袋內，壓扁成長條形，放入冰格冷凍至硬，切粒，搓成圓形方便包餡。

　　3. 粉糰平均分成12份，每粒粉糰壓扁及包入一粒芝麻餡，收口，待全部完成後，放入冰格冷凍15分鐘或留待下次食時先煮。

　　4. 薑湯糖水煮滾5分鐘，使糖溶解及煮出薑味，加入芝麻湯丸大火煮至浮起，另加入小許熱水再煮1分鐘，試味，即成。

小貼士： 

　　麵糰容易乾烈，如包入時烈開，即是水份不足，可以加入少許水搓勻才包，否則湯丸煮時爆餡，流失餡料。

　　搓圓後的湯丸，放在已墊保鮮紙的碟上，防止湯丸黐在碟上，取起時拉破湯丸。