離開莫斯科，繼續西伯利亞鐵路之旅，乘坐 9小時過夜火車，到達俄羅斯第二熱門城市，聖彼得堡，繼續捐窿捐罅，介紹冷門主題玩法！

　　天台危攝，飛簷走壁，次次睇片、睇相，都睇到我腳軟！原來，在聖彼得堡，遊客非法闖入鐵皮天台，飛簷走壁，特別流行！點解呢？我們又如何能既安全、又刺激，站在同一屋簷上，俯瞰浪漫夕陽？馬上介紹當地首個合法的 Rooftop Tour！

1/ 今期流行，點解？

　　都市傳說：尼古拉一世統治時期，不滿聖彼得堡建築物參差不齊，下令全城大廈不得高於冬宮 Winter Palace（世界四大博物館）。

　　自此，聖彼得堡的天際線，井井有條，視野一望無際，吸引大量本地人、遊客冒險闖入各大廈天台，打卡、危攝，發生不少意外。