六月就快到尾,究竟港股係咪可以翻到身?我睇就幾難啦,呢期每日成交都唔到一千億,大家都吽下吽下又一日咁款,不過有啲板塊確實可以留意下。
車股其實呢期相當抵買,畢竟中國電動車「領先全球」(非諷刺,講緊真話),最近內地車企玩降價、汽車補貼又延期,實質上就梗係谷銷量,咁係咪意味內地電動車已經到達飽和呢?部分正確啦,其實只係攻打緊低端市場。
去年大家都見大陸「五菱宏光」賣得幾好,車細、價平,十萬人仔唔使就可以喜提新車,明顯係想針對年輕人市場。而五菱汽車由做麵包車出名,到而家做呢類車仔EV,呢個灣真係轉得靚。博客收到風,唔少車企都喉實呢個市場,預備推出呢類「幾蚊車」,但求谷銷量,睇怕又係一場惡戰!
睇睇大行點睇,銀國際發布研究報告稱,汽車行業在過去幾個月表現強勁,符合該行預期,因為該行在報告中多次提到,上海車展後汽車行業的情緒將得到改善。該行預計2023下半年擁有強勁月度銷售增長和新車型銷售上量的車企將跑贏同行,故繼續看好比亞迪股份(01211)和理想汽車(02015)。
當然,如果大家想掃車股,博客點都係建議買比亞迪(01211),皆因係出口汽車呢方面,BYD已經做出名聲,雖然品牌階級只係類似KIA、現代咁,但韓國車同中國車係外國市場一樣好受歡迎,BYD仲有依樣好處-夠平,好似ATTO 3(元PLUS)係香港已經難訂,外國評價都唔太差,20萬樓下電動車、識行識走、冷氣凍、有導航有車機,正所謂車界名言#仲想點啊。
當然,比亞迪呢期股價都係略高,如果跌返落200蚊樓下,博客都覺得幾值得入手,或者而家分兩三注買,都係已經唔錯選擇,可以睇未來一年都得啦。
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇?】渣馬4名內地跑手被取消資格,4人同屬一個經理人,號碼布疑被調換,你認為主辦方應否酌情處理?► 立即投票