17/07/2020
《Make Money》男人的浪漫,價值幾百萬?!
女朋友成日都會鬧另一半買埋買埋啲唔等使嘅嘢,但佢地唔知道,呢種「男人的浪漫」係另外一種價值投資,不論遊戲卡、遊戲機、玩具、模型,講出嚟都分分鐘嚇死你!今日就同大家盤點下究竟呢啲「浪漫」究竟可以有幾貴!
(Shutterstock圖片)
遊戲卡貴到喊,鑑定後價值百萬!
(Shutterstock圖片)
細個大家必定睇過《寵物小精靈》,比卡超、小火龍幾時都係歷久不衰,雖然我到今日都唔識玩個套卡牌,但細個都曾經湊熱鬧儲過一排。
2018年一條網絡短片真係嚇親大家,有一個男人拎咗一套《寵物小精靈》卡牌,俾人出價,由於呢堆卡牌經過BGS(Beckett Grading Services)鑑定,當中一張「噴火龍」仲畀出10分滿分!單單係個張就價值4萬美金!(約31.2港元)而佢手上持有百張卡牌,估值大該係39萬美金左右(304﹒2萬港元)。
又係時候同大家冷知識下,除咗BGS之外,仲有一間PSA(Professional Sports Authenticator)公司都係做鑑定工作,任何球員簽名、卡牌、運動明星用過嘅手套都可以拎去鑑定,公司會因應品質同稀少度進行評分,拎到高分仲可以即時升「呢」賣到貴價錢!
遊戲機鑲金?送畀女皇嘅Wii流落民間!
(網上圖片)
大約10年前,THQ遊戲公司聽聞英女皇喜歡玩任天堂出品嘅遊戲機Wii,所以整部「全黃金機體」嘅Wii畀女皇,不過聽聞女皇最後係無收到。
究竟呢份天使嘅禮物係咪已經落入凡間呢?有Youtuber揾到,原來呢部鑲金嘅遊戲機,輾轉之間去咗一個荷蘭嘅收藏家Donny手上,而佢本身都係任天堂粉絲,屋企由初代紅白機到超任都有,重點係佢收藏晒每一款色;你無聽錯,係每.一.款.顏.色!差唔多有280部!
呢部Wii點樣估值真係考起人,事關全世界都係得一部,但齋計金價,無一百都幾十萬,真係可以稱得上「最昂貴遊戲機」!
漫畫書唔值錢?「超人」第一期係Ebay賣300萬美金!
(網上圖片)
任何物品經歷日子,佢都係古董,例如當年你阿媽叫你畀心機讀書,唔好睇咁多嘅公仔書!究竟全球最貴嘅一本漫畫可以有幾貴?
2014年一次拍賣會上,一本名為Action Comics嘅漫畫,喺Ebay拍賣網上,以320.579萬美元(約2502.512萬港元)成交,本本漫畫由Certified Guaranty Company(CGC)鑑定9.0嘅高分,世上僅全嘅完美版本,亦都係唯一一本漫畫可以賣到300萬美元以上。
呢本漫畫有乜咁貴呢?主要因為佢係DC人物「超人」第一次出現嘅漫畫,出版於1938年6月30日,當年售價係10美仙。而呢本漫畫當時只係發行咗100本,真係本本都係黃金咁貴,如果當年你阿爺用10美仙買落放係屋企,到今日你拎去Ebay賣,就增值咗3200幾萬倍,真係好過賣股票!
所以幾時都話,男仔啲公仔書啊、遊戲機啊咁,只要保存得好,若干年後都有機會成為稀世珍寶,分分鐘第日孫仔要首期上樓,都要靠我屋企部老爺遊戲機……即係咁講。
撰文:李皆穎
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情