20/03/2019
民主黨黨慶「賣黨友」 卿姐一曲籌50萬皆因…
民主黨(白鴿黨)今日舉行黨慶晚宴,延開58席。多數黨慶就係「出賣」黨員嘅時候,Jenny梗係唔放過呢個機會啦!果不其然,晚宴一開始,就有4位「受害者」喇!
從政會走樣 fit佬變肥 小花捱殘
你睇,尹兆堅、黃碧雲、趙家賢同埋梁翊婷都有份!無論係立法會議員、區議員定係社區主任都無落空,白鴿黨真係夠晒「公平」喇!當中最驚艷可以話係阿尹啦!佢同Jenny講,以前佢有做開Gym,都好fit下,但做左議員之後太忙,冇時間操,久而飛次就變左「肥尹」嚕…
胡志偉身《一點燭光》-16萬
不過話得「賣黨友」又點會免費㗎!例牌菜梗係捐錢叫啲立法會議員唱歌啦!上年特首自掏荷包捐3萬蚊支持元老鴿李華明高歌一曲,政界即時熱議,今年就唔再有呢支歌仔唱喇。
嗱!第一個被點名上台嘅竟然唔係主席胡志偉,Jenny估唔到係許智峯噃!有善長人翁就捐1萬蚊請佢獻唱,佢就揀唱咗Beyond 嘅《俾面派對》,但讀歌詞咁款,Not Good;志偉身為主席點都要唱啦,佢首《一點燭光》,就唔只一萬蚊咁少啦!值成16萬㗎!但係相比起民建聯嗰邊張曉明主任嘅百萬字畫,Jenny估志偉唱到失聲都冇呢個數!
買一送十 卿姐跨黨派甩beat合唱團-50萬
幾時都話元老級前輩,唔只多人俾面,亦都肯為佢捐錢。講緊係劉慧卿(卿姐),卿姐話,上年唱一首都有50萬,所以聽5萬蚊呢個數時,她是拒絕的(普通話)!大家周圍撲水,最後終於傾好30萬成交,卿姐仲拉埋一班前同事好似自由黨田北俊、方剛、周梁淑怡咁齊齊唱,見卿姐拉大隊、仲跨黨派咁有誠意,有人最後加碼20萬,都叫平咗上年紀錄啦!之但係唱首《上海灘》啫,大家啲beat竟然可以甩成咁......卿姐都忍唔住要嗌cut,重新嚟過先得!
幾經辛苦,終於籌到420萬,比2016年時值立法會選舉嗰陣嘅760萬,用上年嘅500幾萬,明顯示係倒退咗,但都叫達成多過400萬嘅籌款目標,Well,真係正如主持所講咁,要俾啲掌聲自己啦!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇