12/09/2023
住高層、會領嘢
早前請「香港最大包租公」湯文亮分享投資物業之道,佢指出,除正路的「位置、位置、位置」( location, location, location )之外,貴點冇問題,重要是選擇座向佳,中高層。因為這類單位升值最快、脫手最易。
係真唔係真?百分之百真!直至⋯⋯
直至乜?直至上周香港來一次「五百年一遇」的黑色暴雨, 立時,不少人親身體驗住中高層可以幾大大鑊!
點解?小弟正是其中之一也。家住老牌大廈( 1972年入伙) 十八樓,每座有兩部客「車立」、一部貨「車立」,輪流維修,從冇問題出現。
就算非常罕有遇上一次半次大停電,以中電的服務水平,也多三兩小時內恢復電力(故我從不反對加「合理」的電費,因香港電力公司服務質素之高,世間少有! ),從未出現過任何問題。
退休要生活優悠,最好當然住在景觀空氣皆好的高層,物業增值能力也較高。
大廈景觀相當好,舊式圖則,地方非常見用,加上戶戶有車位,故此,凡入住的,十之八九不會搬走,因新樓絕難有這種間隔。
好了, 五十一年樓,你又唔走,我又唔走,咁點?自然變成「長者屋苑」。就算廿幾三十歲搬入,一住幾十年,變咗個個七老八十。
幾十年樓齡的老牌大廈,通常住著大量長者。
就以小弟親眼目睹,不少鄰居中年入住的,也走(上天堂)吓一個,走吓又一個。幾十年前行得走得的,則由行動緩慢變到揸拐杖,再紛紛開始坐輪椅。
本來,完全冇問題,照樣可以朝朝出外飲茶晨運,按時覆診,生活質素仍舊維持,雖住在高層,仍能出入自如也。
一場「五百年一遇」的黑色暴雨,令大家本以為「不可能」的事,一一發生。
不過⋯⋯上周四來一次「冇人見過」或預期會出現的特大黑色暴雨後⋯⋯哦,原來以上所有住客,會即時被判「無期徒刑」,真真苦不堪言,無語問蒼天。
乜事呢?正是上周四至周五的超級暴雨,搞到變汪洋。無處不在的洪流,見縫即撲入。小弟住的大廈,當然不例外,大量雨水湧入電梯槽,通通水浸,無一倖免。立時,三部電梯所有零件瓜清。
洪水無孔不入,當然包括電梯糟。
急call工程人員,唔應,因為黑雨,冇人返工!意即,住在大廈內行動不便者,立即開始「監禁」!
大廈水浸,全部電梯零件浸壞,不知何時才能修復。不良於行者,立時被判「無期徒刑」。仍能行的,日日亦要爬十幾到幾十層樓梯,苦不堪言。
就算尚能行動的,不少已膝部退化或患上關節炎,要捱十多層樓上落,是何等艱苦甚至不可能的「旅程」?
立時的生活難題:(一)叫外賣,冇人送;(二)超市不送貨;(三)坐輪椅或行動不便長者,全部無法覆診或睇醫生。
理所當然,住戶狂追管理處盡快搵師傅修理電梯。
答曰:「非常時期,師傅不足,零件不齊,損毁嚴重,大家有心理準備,最樂觀都要超過一星期(可能講少咗!)才有機會恢復!」
這種折磨對所有行動不便長者,實在晴天霹靂,誰人可出手相救?
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票