16/05/2023
賺你錢vs替你賺錢
近年,不停出席準退休或已退休人士的理財分享會。發覺,真係弊!佢哋絕大部分上晒年紀,在專業領域業績輝煌,但一去到「騙子如麻、盜匪如毛」的金融領域,原來大部分不單冇正常智慧,連基本邏輯推論能力都冇!
退休前後理財能力極重要,以確保安全行完人生路。
不少在自己專業叻到會飛者,一旦變散戶,即變儍水魚。
就此,毫不意外,十個投資,九個領嘢,蝕到攤攤腰。奇在,蝕完之後仍「一蠢如故」。
假若佢哋出席完小弟分享會後能有丁點開竅,我已功德無量,救得一個得一個,唔使俾金融大鱷當點心也。
多看書,多思考,提升自己武功。不能靠別人!
通常,最多人問:「碌Sir,應該買邊隻基金?」
我的標準答覆:「為乜你要買基金?」
「想搵隻替我賺到錢的,越多越好!」
本來想真斥——儍佬,發夢冇咁早!不過,想到「話到口中留半句」智者的訓示,立即吞返窒人說話。
華爾街金融大鱷最精設計「金融產品」掠客人錢。
好,改問:「你哋知唔知,所有金融產品,當然包括基金,設計的目標係乜?(個個眼仔碌碌答唔出……)用基本邏輯諗諗,班國際金融佬,會唔會身痕無端端花大量時間去設計乜乜物物基金益你呢?好得閒乎?說穿了,目的只有一個,係透過呢啲金融產品(加大語氣!)搵你錢!再講一次,係搵你錢!班『才俊』口碼玲瓏意大利西裝揸名車好掂咁款,正正是包裝到自己好掂,氹你入水魚籠,然後透過巧立名目的所謂基金搵你錢。方法是炒出炒入賺佣,再賺你行政費!」
個個繼續眼仔碌碌。
靚仔靚女金融才俊,並非善長,唔會無情情為你服務。所以,一切行為,都是為搵你的錢。你幫襯,已先俾佢斬一筆。好,咁剩下的本錢,又能否肯定替你謀利呢?哈哈,若佢哋咁本事,就借貸去為自己投資啦,使乜服務你班烏殊殊客人(即係水魚)呀?」
金融「才俊」個個身光頸靚名牌滿身,錢從何來?客人的戶口而來!
再講一次,所有投資顧問、基金經理、金融經紀,無論講到如何天花龍鳳,各位散戶必須醒醒先認清一個事實:佢哋終極目的是搵你錢而非替你搵錢!明乎此,你就應該少好多跌落「基金陷阱」慘況嘞。
金融世界,個個都想搵你的錢而非替你搵錢,水魚當然被劏。
「碌Sir,死得!唔怪得我供啲強積金幾乎長蝕啦,咁,點搞呢?」問的面有死灰色。
全世界的強積金及各式基金領域皆龍蛇混雜,要懂得保護自己。
「強積金制度乃政府最失敗的政策,鑑粗夾打工仔奉獻十幾萬億俾國際金融大鱷劏。一如上述基本理論,你的錢落到佢手,唔盡掠就奇。好彩間中撞到賺錢機會分多少俾你,已算執到!」
小弟意見,既然被綁住挨打,唯有度計令自己傷得最少,一於只買保本基金,攬住唔郁到退休。切勿以為任何巧合名目基金會令你有高回報,純屬白日夢,早醒早着!
既然水魚做硬,就撳地游水到終點啦!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票