09/02/2024
美斯事件持續發酵,只有香港係輸家!
美斯周日(4日)來港唔落場事件,經過多日發酵,久久未能平息,而事件更加有愈演愈烈之勢,令到香港再次成為國際政治角力場所,「盛事變政事」,相信全港市民都始料不及。
球迷付出真金白銀,唔計買黃牛票,最多畀近五千元,都係希望入場親眼見到「球王」踢波。球王以有傷在身為理由,人在香港,但幾乎係全程no show,傷透廣大香港、內地球迷嘅心,再加上球王喺日本嘅表現相比,難以令人唔覺得,香港成為咗「水魚」。
事件當然值得球迷提出佢哋嘅不滿,甚至係控訴,都係理所當然,因為大家都係真金白銀付出咗而又得唔到佢哋預期嘅「服務」。但上升到政府多次發出官方聲明,甚至喺主辦方唔再申請政府M品牌資助之後,政府繼續以極高層次級別官員,包括文體旅局局長以至特首出聲,就顯示出政府未諗到所產生嘅漣漪效應,會擴散到去有立法會議員諗緊用唔用《權力及特權條例》去調查,以至中國官媒發社評將事件扯上「不排除外部勢力讓香港難堪」嘅講法,連帶阿根廷國家隊去中國比賽都可能會有影響。
美斯在香港的表現雖然傷透球迷的心,但政府政治化的處理手法或會窒礙香港日後舉辦盛事。(AP)
美斯唔落場再加上喺香港口黑面黑,排除咗真係受傷唔踢得,原因估計不外乎三個:一、錢嘅問題,戲金唔足以令美斯落場,又或者無美斯自己嘅贊助商參與,所以佢都零興趣落場;二、主辦方嘅問題,據報道亞洲之行幾個地點嘅主辦方,除咗香港嘅Tatler Asia,全部都係同美斯關係密切,而Tatler Asia可能只係國際邁阿密老闆碧咸嘅老死,甚至可能係臨時加單要來香港,令到美斯有所不滿,所以全程黑面;三、香港嘅問題,美斯賽前賽後避免同特首及其他官員碰面,似乎係有心避見,係咪因為政府之前提出希望美斯可以幫手宣傳香港,而令到美斯心存芥蒂?真係美斯自己先知。
有商界立法會議員直言,事件由第一日已經引起全球關注,全世界都望住香港,作為國際金融中心,無論事件本質涉唔涉及政治,政府嘅處理手法都應該係走向非政治,要畀世界睇到香港嘅處理手法係成熟、大器,「依家搞到戰狼上身咁,外面嘅人會點諗?日後各界運動項目嘅大牌運動明星,以至國際頂流歌星等等,會唔會怕咗香港嘅政治氣氛而唔再揀香港?咁政府仲話要搞更多盛事,係咪真係得個講字?情況再惡化落去而唔去止蝕,輸嘅唔會係美斯、國際邁阿密或者係主辦方,只會係香港!」
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票