• |
  • 極速報價
  • |
  • 會員
  • 產品服務 / 串流版
  • 設定

21/08/2019

開騷爆拍劇遭男藝人侮辱 盧宛茵:如果換成汪明荃,佢會咁講?

  • 加入最愛專欄
  • 收藏文章

  【晴報專訊】盧宛茵(Madam Lo)前晚假旺角開棟篤笑,她在台上除了勁歌熱舞盡騷搞笑本色,更自爆早年拍劇時被一名男演員白眼,現場觀眾高喊開名,她卻一口拒絕,更苦笑道︰「如果我係汪明荃,佢又會唔會咁對我呢?」不少影迷讚Madam Lo夠大方;有花生友就猜測嫌疑犯是誰!

 

 

  入行近半世紀的盧宛茵,前晚圓夢假麥花臣場館舉行《盧師動眾Madam Show棟篤笑》,當晚焦點可算是66歲的Madam Lo細數在娛樂圈打滾多年的血淚史,除了自爆曾在南京拍戲被蠍子螫,原來她更曾被某男星出言羞辱,盧宛茵說︰「我覺得畀人白眼,喺某齣劇佢做我老公,拍完睇Playback,導演都收貨,但呢個人話我無表情、無反應,唔知做緊乜!」

 

自稱唔小器夠堅強

 

Madam Lo穿上黑波點白色長裙高唱《風的季節》,如同小鳳姐上身。

 

  Madam Lo回想當時錄影廠死寂一片,自己就難忍怒火走出去致電監製打算辭演︰「我叫佢寫我移民外國或者歸隱,但佢叫我繼續拍。做演員有時就係咁,點都要做落去。」現場有觀眾呼籲Madam Lo開人名及劇名,她卻回應︰「唔得!畀人知會嬲,我唔想樹敵,我好大情大性,但我又諗如果我係汪明荃,佢又會唔會咁對我呢?」

 

戴上金色假髮的Madam Lo,穿皮褲變身Lady GaGa騷舞技,令觀眾睇到嘩嘩聲。

 

  Madam Lo完騷後受訪,她指該名曾侮辱她的男星現時仍在行內活躍,但與對方之後沒有再合作。Madam Lo直言︰「咁多年來,我覺得遇到咁嘅事好深印象,之後與對方也沒聯絡。當時無喊,唔係我小器,演員情緒最緊要,無mood就好難做,好在我夠堅強!」

 

扮鬼扮馬顯功架

 

盧宛茵入行多年,人緣甚廣,一眾曾合作的囝囝囡囡皆畀面上台。

 

  至於網民齊聲撐Madam Lo,指她事隔多年才爆料處理恰當;有觀眾亦爭住猜測該名無品男星是誰。回說當晚棟篤笑,她大展歌喉及表演輕鬆短劇,而演慣媽媽角色的Madam Lo獲鄭敬基、林作等擔任表演嘉賓。Madam Lo更化身小鳳姐及Lady GaGa勁歌熱舞,盡騷其扮嘢功力。

 

  此外,一眾曾在電視劇扮演其子女的藝人,包括黃智賢、林偉、尹揚明、李浩林及黎海珊等亦有現身上台,眾人更齊齊大合唱,場面溫馨。

 

 

轉載自: 晴報

etnet財經‧生活App   財智‧健康‧品味生活     【立即下載】  iOS版 / Android版
我要回應

  • 生活副刊
  • DIVA
  • 健康好人生