【晴報專訊】無綫藝人周奕瑋（Jarvis）主持的旅遊節目《周遊東京2》近日熱播，他帶領觀眾游走當地小店擦盡「親民價」地道美食，輕鬆狂吸正評。很多網友激讚Jarvis的資訊啱晒香港人；有花生友卻嫌其主持方式造作！

　　娛樂主播出身、曾在東京留學的Jarvis，今年初為無綫主持《周遊東京》成功入屋，相隔約半年，TVB已急不及待添食第二輯。今次一連十集的節目於本周一首播，Jarvis未有讓觀眾失望，帶大家游走大街小巷品嘗激辛拉麵、日式炸雞、A5和牛燒肉放題及豪華魚生飯等。他進食時大啖大啖勁滋味，加上食品價格大眾化，實在非常「邪惡」。

 Jarvis挑戰激辛拉麵仍然擠出笑容，表現專業。

　　至於第一輯最具話題性的100Yen搶衫環節，今次他更加碼到訪「500Yen限時搶衫放題」，見證顧客搶到名牌手袋，令觀眾睇得過癮。

放煙花變可愛美男

周奕瑋在鏡頭前玩花火，順道畀「貼士」教觀眾如何拍靚相「打卡」。

　　Jarvis在前晚第二集中，親身上陣放「槍形煙花」，並走訪東京塔附近乘坐猛鬼的士探靈，為鍾情「食買玩」以外的粉絲帶來另類選擇。前晚節目播出前，他特地留言玩自嘲︰「每次睇完自己玩煙花嗰段都覺得自己投入到有啲『Kai』，今晚大家評下理。」

周奕瑋任職無綫娛樂新聞台多年，上月尾宣傳新節目時請得Super Girls成員撐場。

　　此外，作為一名資深日本通，Jarvis在每集播畢後會在個人FB發布節目中推介過的店舖地址，更配上日文留言給予網友到當地遊玩時作參考之用，實在認真又貼心。不少哈日族高喊一路睇一路口水直流；有人則指節目只顧飲飲食食，內容不夠深度。