炎炎夏日，天氣真係熱得太厲害，每天返工、中午外出吃飯真係熱到乜都唔想食。

　　有時中午食飯都會點選湯飯，但味道就真係麻麻地。不如大家試下煮一個用魚湯底的湯飯，又有營養，又鮮甜好味。大家快快試下啦 !

烹煮時間 : 30分鐘

材料:  (3人份量)

　　勝瓜 200克、紅衫魚 600克、免治豬肉 200克、冬菜 1湯匙、薑片 4片、熱水  500 毫升、白飯 3碗

魚湯調味料：

　　幼鹽 1茶匙

免治豬肉醃料:

　　生抽 1湯匙、清水 2湯匙、雞粉 1/4茶匙、砂糖 1/4 茶匙、粟粉 1茶匙、菜油 1茶匙

做法:

魚湯製法:

　　1. 將魚劏好及清洗內臟，瀝水，抹乾。在魚身表面搽上少許幼鹽，放入雪櫃冷藏及醃1小時。

　　2. 燒熱鑊落油2湯匙，將魚放入，將魚兩面煎至金黃色，每面約煎3分鐘。

　　3. 加入薑片略煎一會，然後注入熱水，開大火滾約5分鐘，然後蓋上鑊蓋再滾15分鐘至奶白色魚湯，加入幼鹽調味，熄火。

　　4. 將魚湯小心倒出，魚肉可以小心起出適量的魚肉，待用。

小貼士 :

　　想魚湯煲出來奶白色，煎魚時鑊要燒熱，煎魚時唔沾鑊及煎至兩面金黃色。滾起時魚肉唔會煲爛，加入熱水會讓魚湯更快煲至奶白色。

 泡飯做法:

　　1 .勝瓜去皮，清洗後切粒，備用。

　　2. 免治豬肉順序加入醃料，將肉略攪至起膠，醃15分鐘。

　　3. 冬菜用清水略浸5分鐘去除鹹味，渣乾水，備用。

　　4. 將魚湯煲滾，將勝瓜粒加入煮2分鐘，然後將豬肉碎及魚肉碎加入。最後加入冬菜再滾2分鐘，試味或加入適量幼鹽調味。

　　5. 將湯倒入白飯內，即可享用。