20/11/2013
成日俾人講是非,點算?
「我好快頂唔順,班是非精好快迫走我!」U的低EQ享負盛名,我們一班朋友對於她的燥底見怪不怪,偶爾在背後拿來當笑話。反正她是知情的,就像我今次又借她的題發揮。
「佢地個個是非當人情,成日走嚟套料加鹽加醋,我唔出聲就唱我黑面態度差。」U彷彿要一下子補償十世無講過嘢的缺失。
「女人嘛。」我企圖以「女人」作為一切問題的解釋。U在女人堆工作,上至大老闆下至茶水阿姐,統統是女人。女人啊,任誰都知道女人這種生物最難纏。(利申︰沒有說過男人好應付,男人無賴起來,14巴港女都要投降。)
「真係好煩!返工可唔可以只談工作,不談是非?你要講,Fine,但Leave me alone please。」
「講英文佢地就怕你?」我不留情面哈哈哈。她目露兇光想把我吞進肚子裏,我安撫︰「好啦,咁你即管講佢地點衰法,我聽。I promise。」隨即chok出一個誠懇過保險經紀的眼神。
U︰「xxxxxxxxxxxxxxxx(下刪百萬x)」這一刻,我相信她其實是廿世沒說話。「好喇,講咗出嚟係咪舒服啲?」我笑咪咪的,心暗忖︰「你今次重唔中伏?!」
「佢地呀xxxxxxxxxxxxxxxxxx」U再來百萬x。我形容是「x」,因為真的沒法想出一個有意思的字來,反正U的同事如何蜚短流長並非關注重點,我只想U心裏舒服。「我講完喇。」她終於告解完畢。
「呢個世界係咁,人講你,你又講下人……」話未說完,U搶白︰「我邊有講佢地喎!」我蠱惑地望她一眼,問︰「咁你頭先長篇大論講咩嘢?」她無言。
「係囉,唔係個個都有資格同深度去探討佔中對本港的影響、人性善惡,或者求讓我悔過可不可再戀過;而且對孤單一個感到本能性恐慌,咪周圍搵啲嘢講下囉。如果你成日為呢啲而忟憎,甚至放棄份鍾意嘅工,就係最抵死嘅Loser。」
「潔,你真係最乞我憎嘅女人。」U笑了。
原文刊載於ctgoodjobs.hk
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情