28/08/2024
香港經濟好似一鋪新牌
有老友話特首表示香港經濟現在重新洗牌,問我有甚麼意見?我話英雄所見略同。老友唔明白,點解會係略同?我認為香港經濟已經洗牌完畢,現在是一鋪新牌,睇吓香港政府以及香港人識唔識得打呢鋪牌。
我讀中學時,有次阿媽約了三個生意佬打牌,佢臨時唔得閒,叫我替佢打,同時下了一個死命令,准輸唔准贏。三個長輩知我打牌犀利,唔肯同我打,不過,用打牌理論教我做生意。
即使開首一手亂牌,亦可靠技巧入章食糊。(Shutterstock)
一鋪新牌就好似一個人出身,出身好就好似一鋪靚牌,九唔搭八就是出身卑微。不過,出身好未必可以食糊,出身卑微亦未必會輸,最緊要是得到自己所要的牌,可以經摸牌、上牌、碰牌來達到目的。做生意也是一樣,可以靠自己、靠伙記、靠環境來達到目的。同做生意唔同,打牌是規定數目,一定要將無用的牌打出去,做生意則無此限制,可以將蝕錢的生意保留。很多人做生意失敗,就是太多生意要兼顧,蝕本生意拖累賺錢生意,當經濟環境轉壞,賺錢生意不能支援蝕錢生意,最後便是全盤生意失敗。倘若那人早日放棄蝕錢生意,不但不會生意失敗,甚至可以成為一個成功生意人,即是食糊。所以,識得放棄,才可以做到一個成功商人。
近日有很多舖頭執笠,很多人話香港經濟太差、市民北上消費,大集團都養唔起咁多舖頭。其實,任何連鎖店,都必定有一些分店賺錢、一些分店蝕錢。在以往,連鎖店為了維持集團形象,不會閂蝕錢分店;今時唔同往日,連鎖店只會保留那些賺錢分店,而結束了的分店亦開始被國內品牌連鎖店租用。相信大約一年時間,大部分執笠的舖頭將會重新有租客,香港鋪牌只會愈來愈靚。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇