《溏心風暴3》李司棋夏雨關菊英 等聚頭有默契

　　【晴報專訊】爐火純青，是做戲也是做人。

　　默契，呈現在鏡頭前，也在台下自然流露。

（左起）李司棋、夏雨、關菊英

　　《溏心風暴3》的「鐵三角」陣容，李司棋、夏雨、關菊英，一個溫婉、一個幽默、一個機靈，但同樣的專業，完完全全告訴你以上道理。

菊＝關菊英；夏＝夏雨；李＝李司棋

　　當年《溏心風暴》第一、二輯熱播掀話題，連環打破收視率、狂掃獎項、晉身經典劇目，到現正播出第三輯，前後事隔十年，人事翻了再翻，卻能找回原班中堅人馬上陣，實在難得。

菊︰唔駛游說，家豪哥（監製劉家豪）一講，我們就話好，快些傾啦！

夏︰07、08年拍完兩輯後，大家不時見面，常說「唔知仲有無機會再拍」，後來家豪去了另一個電視台，畢竟又隔了這麼久，大家都放低了，你看，我都無減肥！怎料他回巢，號召大家再拍《溏心》，將我們藏在內心的火重新燃點。我蠢到連錢都無傾就去拍！

菊︰我真係唔信呀！

夏︰唔信都無辦法，當時劇本未出，家豪哥先要看大家意願，他才搞這王牌項目，係姣婆遇著脂粉客！

李︰你可唔可以講得好聽點！難得之前兩輯有些成績，應該要有個紀念。唔係義氣，是默契。

夏雨三演情義老好人

　　《溏心風暴》是司棋姐當年復出之作，最為人津津樂道的，是大契（司棋姐劇中角色）金句句句金，她更成為TVB視后，因此她也承認特別難忘和有感情。

司棋姐表示很喜歡今次的角色，有事業又有家庭，錫個仔、永遠盲撐老公。

李︰有些金句經常重播，嘩！原來我真係青筋暴現！劇本寫得好，講到家庭的事，我都有共鳴，自然做得肉緊，原來用咗力，係會入咗觀眾個心度。今次的角色秉承之前兩輯，有中國女人傳統美德，但今次變化大些，有好多場口有戲做，我看劇本時也眼前一亮。

菊︰好喜歡司棋姐今次的角色，很多面，在家是正媽、老公大晒，但又有自己事業，在公司是火，有好多兄弟的火姐。

夏雨指最難忘一場父女戲，「女兒（陳敏之飾）的孤僻，原來是做父親的責任，於是向女兒贖罪。」

夏︰我的角色由唐唐到鮑鮑到今次正哥，都有共通點，是典型的老好人、講義氣、重情義，我好喜歡「報恩」這個大前提，就是他為了報恩而搞出40集情節！的確會令人懷疑，世上係咪有人咁傻，我自己覺得世界上是有這樣好的人，不過很少。

菊︰我個角色講講下嘢，就會借用歌詞，我估是專登寫畀我。

夏︰我估係為咗慳版權，所以就講出來而不是唱！

菊︰配合我的角色背景呀！

背誦對白Vs即興創作

　　看著他們你一言我一語，講到開廠捱夜也是樂事，既然如此有默契，拍攝時又有何趣事？有沒有玩爆肚考驗老拍檔的反應？

菊姐在劇中和阮兆祥扮演姊弟，事無大小都為黃家出頭，但最後要大嫂（李司棋飾）出面擺平。

菊︰我一定唔會改對白，會背好晒，一字不漏是要求嚟！

夏︰講反叛，只有我一個！

李︰他（夏雨）好得意，常要堅持，好鍾意同「老師」頂嘴。

夏︰我比較即興，不可以一字不漏背對白，我好尊重編劇，劇本寫得很好，但也需要演員的創作。演戲有一百種方法，沒有方程式，所以我用自己的方法。每個崗位都要發揮，最值錢的就是創作。

菊︰我演戲經驗不多，加上我的性格，我要跟指示，只要他不改意思，畀到尾句我接到就可以，如果我接不到就會出聲。

李︰我唔驚他，我們由黑白電視拍到現在，太了解他，他不會不顧及別人，一定畀番個尾句你，甚至事先聲明（點做），好公平的。

《溏心》變長青系列？

夏雨稱正哥是個大好人，為了報恩，搞出40集劇情。

　　既然演嘅同睇嘅都念念不忘，將《溏心》系列變成長青劇、4、5、6集……一直拍下去好嗎？

李︰唔敢諗。

夏︰最好啦！

菊︰好難囉！

夏︰唔係一廂情願的事，今次好至有下一次。

李︰就算好，都唔可以輕易開（續集），係好沉重的問題，劇本、角色怎樣？要好多元素才能成就這個緣份。