26/08/2024
職場女王Son姐|動物老闆使用說明書(4)!邊種老闆屬敏感體質滿身刺?貓頭鷹360度盯實員工、跟著「龜縮」鴕鳥無運行
張慧敏 Alison
張慧敏 Alison
張慧敏Alison(Son姐)
職場女王身世
橫跨幾世代,馳騁幾十年
一雙慧眼,見證職場盛衰
戎馬一生,經歷大小戰役
辣筆寸嘴,有的放矢,百無禁忌
清心直說,如有雷同,不是巧合YouTube:張慧敏Son姐話
Facebook:職場慧眼 – 張慧敏Son姐
職場女王
逢周三更新
職場從來都是適者生存,就算是上司老闆也靠著不同手段、管理方法在公司站穩陣腳。今期繼續拆解各種動物老闆的心理。
Read More︰
職場女王Son姐|揀工不如揀老細!公開動物老闆使用說明書︰點應對清心寡欲老好人?真豬、假豬有甚麼分別?
-
職場女王Son姐|動物老闆使用說明書(2)!牛型老闆做「壞」人、烏龜老闆最自私?邊種上司無恥挑剔常惹事?
-
職場女王Son姐|動物老闆使用說明書(3)!跟著狐狸老闆學到嘢、獅子老虎是強者但不濫殺!恐龍老闆最兩極化︰絕世好老闆VS食古不化
【刺蝟】
顧名思義梗係周身刺啦!只不過咁,刺蝟都有分有料、冇料兩種。有料嘅刺蝟係自大狂,獨行獨斷自我中心,容不下、納不到任何和自己不同的立場看法意見。不過若然夾得到,都可以和平共處,都有溫馴善良好玩嘅一面。
至於冇料嘅刺蝟,任何時候都豎起滿身刺,只是為了掩飾自己根本乜都唔知唔識,更加唔想知唔想識,所以有你冇理惡咗先,生人熟人都勿近,偏偏自我感覺好良好。雖然海鮮不是刺蝟類,不過這種特徵在很多老海鮮都有!
【鴕鳥】
明明有體型,擺明有力氣,明明是隻鳥偏偏扮烏龜縮頭。這種老闆是選擇決定困難症患者,不論做人還是做事,拖延拖延再拖延,而且還有縮骨症,卸膊卸膊再卸膊。
對翼幾大都無用,原來唔識飛,不過對腳天生異稟靠得住,跑起上來時速70公里唔係講笑。遇著這種老闆上司,做下屬員工一係食塵一係食泥,一係閉氣一係受氣,啃得落忍得住都冇話唔得。有啲人就係靠乜都啃得落、忍得到上位,呢啲就係叫做能人所不能!
【井底蛙】
坐井觀天,就以為個天得咁大!在視線範圍之外的,全部睇唔到,根本不存在。這種老闆上司,永遠活喺自己嘅世界之中,不知幾沉醉,自我陶醉,唔識寫個死字!以為井底最安全實無死,實情井是會乾涸的,氣候水溫會升亦會降低,冷血動物,是受不起溫差變化的。
我都想知,對著一個井底蛙老闆上司,下屬員工可以有甚麼生存之道?不過咁,我見過一群井底蛙圍著井底蛙王,大家很高興,樂在其中喎!大家見過未?
【貓頭鷹】
貓頭鷹其實很醒目,頭可以360度轉,夜晚唔瞓覺唔係因為唔鍾意瞓覺,而係因為要獵食。
不過用貓頭鷹形容老闆上司,會不會是因為金睛火眼360度無時無刻(目及)實員工做乜嘢?對住呢種老闆上司,大家就要識得扮工啦!即使你很努力辦公,但不懂得放大動作,拖慢速度確保能被睇到的話,係徒勞無功㗎!
廣告時間:我寫嘅「動物扮公室」好有參考價值㗎!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情