「呀邊個邊個，你入一入嚟。」

　　「哦。」

　　每個打工仔，返工隨時有機會面聖。可能喺你咬緊份蛋治、上緊Fb、影印ing、或者唔小心喺Pantry撞到的時侯。總之，身在辦公室一樣要「On call 36」，否則失救的就只有自己。

　　當認清打工仔是每分每秒都須處於「I am ready」的狀態後，下一步最好做足心理準備。根據辦公室生存史，老細急Call大路有5個原因︰

1/ 有單嘢畀你跟

　　可以說是好事，又可視之為大鑊。「有嘢跟」3粒字可圈可點，好的是有新項目負責，多一個發圍的機會；大鑊的是，老細交畀你的是「蘇州屎」，是「Mission Impossible」，又或者你手頭上已經排山倒海，差在你未跳海。

2/ 問侯你

　　「近排點呀？」呢句一出，個心即刻離一離。劇情的發展，就視乎老細之心情、你的回答、你近來的表現等。可以肯定的是，老細笨唔期望你hea答一句「I am fine, thank you!」。

3/ 發表偉論

　　一坐低，開始語重心長地說故事。由公司發展史、個人升職史、到做人處事、個Project從前點點點，總之整個談話過程已單方面進化成獨家專訪，表面塞錢入你袋，希望名師出高徒；實質可能想暗示你要再做好啲。

4/ 話你知「升職唔加人工」 / 「加人工唔升職」

　　呢種入房機會大概一年只有一、兩次，亦是打工仔最期待見到老細的畫面。可惜，大部分老細只會升職加人工二選其一。例牌對白有︰「我睇好你，但公司暫時未有位住。」or「我睇好你，但經濟唔好，公司希望大家一齊共度難關，遲吓一定有機會。」（Ok fine……）

5/ 照吓你有無「肺塵埃」

　　就算職級再高、有多年經驗，只要你一日未係老細，仲係卒仔，都總會有做錯事被「照肺」的機會。如果小事如遲到、早餐食太耐，頂多有一兩個Kindly reminder；但如果Send錯文件畀客、條數唔啱，就好明顯無事都會照出肺癌。

　　想完好無缺走出老細房，最好識避重就輕，從小事入手作開場白；其次，要注意用字，盡量避免講「跟跟」、「睇睇」、「諗諗」等虛過煎堆的字眼。同時，要表現鎮定，有問必問，驚出錯就事前做足功課，Tip中老細召你入房的原因，生存機率就自必然直線上升。

　　提提你︰老細同你共處一室，有無損失就睇閣下造化。