結婚初期，兩公婆搏殺格，有細路之後，家頭細務交畀菲傭負責，大安旨意，唔知家庭主婦做乜㗎，煮飯洗衫抹地洗廁所換床單，心諗有幾難，大把時間煲劇搽指甲，我太幼稚啦。

　　十年前，老婆管三四百人，話退就退，頭也不回唔戀棧，卸低套裝衫，披番條圍裙，全職做主婦，菲傭唔再請，自己家務自己負責，洗盡鉛華，專心洗永遠洗唔完嘅衫，我太佩服啦。

　　十年後，輪到我扮瀟灑，有三個月賦閒在家，諗住有排歎，點知天不從人願，直頭辛苦到癲，仲畀我無意中發現，老婆係外星人，膽識勤力到震，嚇死朕。

　　「老公，洗冷氣機。」「吓，點洗呀？」

　　「擔張高梯，爬上去吸塵，筷子包塊布，伸入機殼逐處抹，隔塵網另外洗擦。」「……五部喎，搵人洗啦。」

　　「做唔做，你唔做我做。」「……」

　　初嘗家務辛酸，某日又見到大人揸住架生，抹露台天花，伸頭出圍欄，欠身抹玻璃外框，廿幾樓望落地下，心都離埋，仲要擔心跌架生落樓下。

　　地球邊有嬌滴滴美人，纖纖玉手，曾經手執大權，今日任勞任怨，唔怕污糟邋遢，痞低爬高打理頭家。我終於明白，原來佢之前講：「可以退休，唔可以唔做嘢。」唔係話我，而係佢現身說法。

　　愛情講無條件付出，講自願，永遠唔講「幫」字，男主外女主內，唔可以用嚟當藉口逃避家務重責，做得到嗎？愛情講欣賞，用行動說話清楚表達，愛人見到聽到感受到，自覺驕傲。兩情相悅，唔係童話，講付出講欣賞，加三分容讓，緣定今生，話咁易，羨慕嗎？

　　「大人，唔辛苦唔驚呀？」「驚㗎辛苦㗎。」

　　「洗冷氣抹露台幾耐一次呀？」「個個月。」

　　「救命，我係咪嫁咗個外星人呀。」