05/08/2016
我撑90後
早排網上睇到個post,標題《90後見工等半小時未見老細,即走》,唔知真實定虛構,淨係想加把口,如果發生喺我身上,等15分鐘已經撇咗,90後居然等足半小時,孺子可教也,我撑90後。
「公司對我有expectation,唔希望我遲到;我對公司都有expectation,約咗10點in,而家都10點半,如果你約個客10點,會唔會遲到半小時?」90後理直氣壯,擲地有聲,天下間無人可以反駁。
明知理虧,無講對唔住,無代遲到腦細道歉,反而招招積積:「你喜歡啦,而家係你嚟求工作,等老細係常識。」呢個講法好有階級觀念,代表大部分腦細或者嘍囉嘅真實信念,潛台詞係:我高你低,我尊你卑,我錯你要忍受,總之搵工即係求人,求人就要低聲下氣,就算幾唔合理,都要強顏歡笑,嗗聲吞咗。
90後走前拋低句:「你們這一代奴性很強。」後生仔即係後生仔,雖然講得幾啱,凡事留一線,日後好相見,唔使勞氣激親自己,亦唔使教精人哋,奴性重,唔慌會與時並進,創作唔慌掂,畀人淘汰只係遲早。可惜,上下不和,勞資對壘,喺見工一刻,顯示「不平等對待」陋習,禍根已經不知不覺種下。
其實,等人無乜問題,只要合理,遲到嗰個表示歉意,直接或者間接,等嗰個感受尊重。禮多人不怪,花花大轎人抬人,一句唔好意思,化解無謂紛爭,增進人與人之間信任,提升工作效率,大模大樣例遲嘅「高中低層」,淨係識以大欺小,永遠去唔到呢個層次。
想人點對你,先要點對人,將心比己,公平啲禮貌啲謙虛啲準時啲,大大聲同捉住你開會嘅「高高層」講:「唔好意思,約咗人面試,走先,唔想遲。」公司士氣由呢句說話開始。
轉載自: 晴報
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票