射波（即未經申請就自行放假），相信每個打工仔都試過，原因不外乎傷風感冒發高燒。美國求職網站CareerBuilder早前委託調查公司進行調查，訪問2,500名僱主及3,100名僱員，收集到一堆千奇百怪的射波理由，而最神奇的是射波者竟然咁都噏得出。

 

騎呢理由一覽：

 

　　-空氣中嘅臭氧令佢架車爆胎

　　-屋企個壓力鍋爆炸嚇親佢個妹，所以要留喺家中陪伴家人

　　-要出席太太表弟隻寵物嘅葬禮，因為佢係叔叔而且要扶靈

　　-屋企被警方突襲所以不能離開

　　-要指證搶劫佢嘅毒販

　　-由於髮根受損而要去做頭髮護理，如果唔整好會無面見人

　　-以為罐貓糧係吞拿魚，食錯後感到非常不適

　　-佢隻草泥馬病咗

　　-用脫毛膏脫胳肋底毛導致化學燒傷，放唔返隻手落嚟

　　-打緊一生中最重要嘅保齡球賽，行唔開

　　-喺屋企發現蜘蛛後出現創傷後壓力反應，要留喺家中同蜘蛛搏鬥

　　-當日有比返工更值得佢做嘅事

　　-食得太多生日蛋糕

　　-被鴨仔攻擊

 

　　以上理由都咪話唔奇怪。不過67%受訪僱主表示，即使理由幾咁匪夷所思，但疑點利益歸於員工，仍然會選擇接受。33%僱主聲稱會驗證員工說法真偽，其中68%會要求請病假員工出示醫生紙，43%會致電員工了解，18%更加會親自駕車駛經員工屋企查探。而22%受訪僱主坦言曾經因為發現員工射波而怒炒佢。

 

　　正所謂：「若要人不知，唔好太低B。」有啲員工毫無警覺性，將自己射波證據放上Facebook及Instagram，慌死無人知。調查顯示34%僱主就曾經於社交網站發現員工詐病，其中27%即時炒人，但55%只是強烈譴責員工的不誠實行為，警告對方日後不要再犯。

 

射波高峰期

 

　　另外，受訪僱主表示最多人請病假的月份是12月（21%）、7月（16%）及1月（14%），而最多人請病假的日子就是星期一（48%）及星期五（26%）。

 

　　雖然節日期間缺席率高企，但只有8%受訪僱員表示曾經在這些月份詐病。其中，大部分人會利用多出的時間陪伴家人和朋友（76%），亦有不少人會進行節日購物（12%）和家居佈置（9%）。

 

　　點都好，射波始終會影響其他同事工作，如非必要都係唔好隨便射。同埋，就算係，都搵個合理少少嘅理由啦！

 

Source: ctgoodjobs.hk

• 

【etnet 30周年】多重慶祝活動一浪接一浪，好禮連環賞！ ► 即睇詳情