選舉曲終人散，詭異情節由頭帶到落尾，結果卻係出乎意料之外嘅良好，估唔到會係咁樣發展。每年年初二，鄉事派及政府官員，再搭多個葉劉淑儀都會走去沙田車公廟，會一會車公，會俾支靈籤你，反映時勢，嬉笑怒罵，講起時事評論員，佢真係第一代。今次嘅選舉結果就好似嗰支靈籤咁，玄玄哋，留咗個想像空間俾大家，點樣解讀悉隨尊便。

 

　　最重要嘅解讀，就係選民對梁振英呢個人嘅態度，喺今次嘅結果俾咗一個指標大家。泛民加本土所得議席，比上屆有進賬，由27席升到30席，需知道，佢哋全部人都曾經表明反對梁振英連任。

 

　　向來自信滿滿嘅梁振英，冇令我失望。佢見到呢個結果，選擇見樹不見林，喺噚日開行會前，笑面盈盈咁樣回答記者有關選民係咪唔想佢連任嘅提問，講出一句：「有啲明顯反對我嘅議員都落選咗，冇當選到。」然後就係話泛民當中有比較激進嘅議員未能連任，認為市民係清晰反對拉布同議會抗爭嘅手法。王維基、田北俊、黃毓民明顯就係佢嘅目標。

 

　　可以將以偏蓋全不卑不亢不慍不火咁樣演譯出嚟嘅，捨他其誰？所以，我哋大家亦都可以從選舉結果知道，明顯支持梁振英連任嘅人都冇當選到，高呼「CY係完美架」嘅涼粉村姑金鳳凰陳玉娥勇奪484票，排全港得票第三（倒數）〈唔使排包尾好叻叻〉，不過人哋而家都移情別戀，唔愛CY愛AY了。

 

　　加埋同區嘅李偲嫣，共得二千幾票。嗱反梁嘅人唔好太開心住呀，咁樣即係話多過689票！咁689搵返呢班人出嚟入選委會，就夠佢連任三四次都得啦！ 

 

　　事實上，數據係一定唔會呃人。整個泛民主派都係反對梁振英連任，以最簡單易明嘅邏輯，呢一堆選票已經俾咗保皇黨同北京強烈訊號，經過咗呢四年以嚟嘅風風雨雨，泛民建制維持得票率大約六四比，唔理係含淚定係含怒火，投咗出嚟結果就係咁樣。 而建制派暫時都冇人夠膽講一句支持梁振英連任，除咗被喻為「下一個梁振英」嘅社會工作者律師何君堯。

 

　　咁點解689仲可以定過枱油呢？原來，睇返六月時候Now新聞台嘅節目《政情》，已經講咗西環為梁振英連任訂咗目標，就係建制派保住40席，事先已經預定會少咗3席，而家冇多冇少，剛好40席。你話建制派今次大敗咩？事實上佢哋已經完成任務，689可以滿心歡喜咁樣公然取笑王維基等人，西環幾個契仔契女都可以公然咁多謝中聯辦。

 

　　換個角度睇，今次泛民陣營有多位老將落馬，但換返嚟嘅係一眾新生代，而且行得前嘅新生代得票仲高過傳統泛民，絕對係值得鼓舞。

 

　　新界西朱凱廸成為全港票王最為震憾，有唔少身邊新界西的朋友決定投給朱凱廸，是建基於他打正旗號反對官商鄉黑利益集團，加上有實際往績，從十年前阻拆天星皇后碼頭、七年前反高鐵運動及捍衞菜園村，到今年揭發嘉湖山莊泥頭山，自發去執走泥頭，得罪新界惡勢力，但爆發點相信係周永勤事件，唔少人擔心朱凱廸會成為下一個受害者，喺網上一大片呼聲呼籲選佢入立法會，先可以最保護到佢人身安全。 呢啲正正係對霸權、黑勢力的控訴。 

 

　　創業難，守業更難。一眾新世代「議士」，唔好辜負幾十萬人對你哋嘅期望，打好呢場議會嘅仗。更加唔好放過選舉期間篩選、種票等等怪事。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票