六八九特首最鍾意用嘅四隻字，就係「迎難而上」，由競選到當選，到而家做咗四年，直情成為咗佢嘅最高管治哲學。去到最近，我哋終於可以睇到，迎難以上，原來係製造一啲困難，捨棄一啲簡單直接嘅路徑，等下屬迎面撞向困難，佢就坐喺冷氣房，叫啲同事「上呀！」

　　喺梁振英治下，就係好多呢啲本來好簡單嘅事情，變到好複雜，要一班本來抱住正常思維嘅市民，要費唇舌去說服解釋俾其他人聽，件事本應唔係咁。

　　橫洲事件，就係最明顯嘅例子。以前，我哋一路都以為，推政策做公開諮詢，係天經地義嘅事，至少，要確保每一個受影響嘅群體，都可以有一個公平機會去表達意見，同埋保護返佢哋各自嘅利益，將傷害減到最少。但原來六八九嘅邏輯係截然不同架，即使係最受影響、要被拆村嘅村民，都唔算係持份者，如果我要攞你條村嚟起屋，但你反對又話要抗爭，就係你唔啱！你就係對唔住晚晚瞓床板劏房嘅人，你就係自私！只有經過篩選、政府認可嘅「地區領袖」，先算係持份者，佢哋同上帝一樣，話要起萬七，就起萬七，話起四千，就起四千，點解呀？因為人哋製造緊「經濟效益」！佢哋有牙力！

　　如果公眾反對呢種模式？噢好簡單啫，只要加上「迎難而上」呢套思維，點做政策都係是對的，公眾都一定要接受，如果唔係我哋邊得嚟搵地建屋？粒粒眼淚皆辛苦呀！

　　政府對持份者嘅睇法同公眾有唔同，唔單只係政策層面，就連選舉呢樣關全香港人嘅事，「香港人」呢個持份者原來又係不受尊重。屬香港「第二管治團隊」嘅中聯辦法律部部長王振民，對於中聯辦干預香港選舉嘅指控不以為然，反過嚟話「如果中央不關心香港選舉，反而不正常」；基本法護法宋小莊即刻跟隨主旋律，撰文話中聯辦「關注」有理，更加明言香港嘅選舉非自治範圍內嘅事務。

　　原來香港人嘅選舉，唔可以剩係理香港人，要由中央去「關注」，更獲得香港政府入面嘅官員，譚志源去認證呢個講法，話中聯辦為選舉去「接觸各界」係好正常。對「正常」呢兩個字嘅解讀都有咁大分別，難怪兩地對高度自治入面嘅「高度」去到幾高，有咁大嘅思想落差。與其係咁，不如分家。

　　《BJ單身日記：生得啦Baby》裏有一句對白，我印象好深刻。當日BJ喺佢上司面前劈砲，腹大便便嘅佢對呢位上司用污糟手段處事嗤之以鼻。佢講咗一句：「希望第日我個仔大個咗，正直可以再次成為時尚。」（"Maybe when my boy is old enough to understand, integrity will be fashionable again."）講中喺地球另一邊嘅香港人心聲，呢一日，我哋幾時先見得到？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情