三個月前，某城市首長cosplay過周處(按:周處除三害故事主角)，即係三害其中之一嗰位。呢排，佢做返老本行，安守本份，cosplay返做一隻狼。狼出名鍾意玩一種動物，就係小豬。開講都有話，《三隻小豬》，呢個家傳戶曉嘅寓言故事，豬大哥起稻草屋、豬二哥起木屋，都俾豺狼一嘢吹散，係豬弟弟醒目，一磚一瓦起屋，堅固非常，雖然唔知塊地係咪丁地，定係只係短期租約，但狼都冇佢乎，敗走而回，三隻小豬，同佢哋爹娘，從此過住安祥嘅海港小豬生活，簡稱港豬。

 

　　不過，寓言故事衰嘅地方，就係唔會講俾你聽後續仲有故事發生。因為豺狼嘅陰影，從來都冇離開過小豬，今日我哋終於知道，狼後來派咗另一隻被收編嘅小豬，叫呢幾隻小豬起個足球場，但係就要動用原本間屋嘅磚，有得踢波強身健體，小豬當然即刻應承，但係就因為咁樣，間屋防禦力低咗，俾狼承虛而入，今次佢唔用風啦，直接用推土機，推冧成塊地，從此小豬被困豬籠，任狼宰割，足球夢碎。

 

　　以上係一個寓言故事創作出嚟嘅經典改篇，我相信香港人都仍然有創作自由嘅，如果頂唔順，想過下癮出律師信，追究吓責任嘅話，就飛去英國格林兄弟個墓前搵佢哋算帳啦吓。至於以下所講嘅內容，同上面呢個故事係咪相關，就由看倌自行判斷。

 

　　呢幾日發生嘅事，令身邊一啲藍絲個心又受到好大挫折，心入面嘅一片藍開始變淡。因為佢哋發現，原來689同上帝一樣，話要起就起，要拆就拆。

 

　　沙田石門工業區旁邊，上屆政府喺2011年邀請傑志同賽馬會，租用一塊土地俾佢哋興建足球訓練中心，根據傑志嘅形容，當時係得到民政事務局嘅「政策支持」，配合政府當時支持足球發展嘅政策，先至成功策劃賽馬會傑志中心。可能有人會話，就係因為上屆政府冇致力去解決土地問題，先至令到今屆689要咁頭痕周圍搵地，但事實上呢個係港府難得一見嘅「德政」，因為肯批地俾體育發展。最後，傑志聯同賽馬會，用咗8400萬，起咗而家呢個佔地1.5公頃嘅賽馬會傑志足球訓練中心，去年啟用。政府係以短期租約形式，將呢塊地俾傑志用，為期五年，至下年9月屆滿。

 

　　上星期都已經講過，689最鍾意就係先製造困難，再叫下屬迎難而上。究竟收一塊廢車場、貨倉地容易啲，定係收起一塊用咗幾千萬整好嘅足球場容易啲？再講深入啲，究竟要收回一塊無租約、被長期霸佔嘅土地順利啲，定係一個有租約、但有社會責任繼續租俾佢嘅地會更順利？689用行動答咗大家，佢揀後者。

 

　　先以「摸底」形式，「諮詢」沙田區議員及其他人士，贊唔贊成用呢塊地及旁邊一塊政府空地，興建公屋。又再重施故技，如果唔係有傳媒揭發，可能好快手又暗渡陳倉，將傑志同賽馬會捐款嘅心血化為烏有。

 

　　689出嚟「解畫」，話傑志未搵到其他地前，可繼續以短期租約租用呢地，而且中心用地並非第一期發展。嘩，真係皇恩浩盪。睇完佢咁講，我要向佢講句唔好意思，原來一眾傳媒之前一直都怪錯咗689，話佢係「摸底」，事實上，佢都唔係摸底，狼影一直跟隨住佢嘅尾巴，佢只係「知會」持份者，政府有意收返呢塊地起屋。

 

　　政府將玩弄平民嘅技倆操作得爐火純青，要你使咗接近成億，然後收返你塊地，拆咗佢再起其他。重置？關我咩事？第二塊地？唔得架我哋一定要用呢塊地架，唔犧牲體育，咪犧牲住屋囉，你哋傑志點對得住千千萬萬劏房戶呀？

 

　　689係用建公屋嚟做籍口，去掩飾佢喺其他用地唔敢挑戰嗰啲棕地當令戰嘅權貴。而呢個足球計劃，係上屆曾蔭權政府遺下來嘅產物，除咗要同上屆拗頸，或者向權貴淆底之外，我暫時諗唔到其他理由。要稱讚689嘅就係，人物性格非常連貫，同佢兩年前宣之於口，體育係冇經濟貢獻，始終如一，堅持己見。

 

　　傑志呢個球場，有做青訓、小童訓練隊，訓練緊嘅可能就係你我他嘅仔女，他日（可能係出年）球場被拆卸，我哋就有責任同佢地講，係邊個葬送咗你哋嘅足球夢？我哋就為佢立個碑，認住佢，係梁　振　英。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇