平地一聲雷。一個月前，立法會選戰如火如荼，朱凱廸民調數字喺低位徘徊，連一席都攞唔到。一個月後，高票、當選、被威嚇、安全屋、橫洲事變，朱凱廸嘅人生從此徹底改變，我諗佢更加估唔到，自己一直深耕嘅新界土地議題，會打開咗潘朵拉的盒子，一次過將政壇江湖事呈現喺公眾眼前，更觸發一場管治危機，下屆特首選戰，亦有一個非常畸型嘅序幕。 

　　件事由一開始已經行差踏錯，由梁振英領導嘅小組決定由「摸底」代替公開諮詢，而根據已經被傳媒披露嘅政府內部文件，政府係同鄉紳系區議員，以及「地區領袖」摸底後，因為對方拍枱發火反對動用棕地，進而採納時任元朗區議會主席、民建聯梁志祥嘅縮減規模方案，決定偏離原本計劃發展嘅棕土，而去郁動旁邊幾條無權無勢嘅非原居民村落。 

　　「摸底」，係大機構同官方部門有大計劃要做之前嘅慣用手法，一嚟要摸下牽涉嘅人嘅底線，同時，亦希望幫佢哋「打定個底」。呢樣嘢本身唔構成嚴重嘅問題，前提係「摸底」雙方唔好將佢視為利益交換嘅場地，而且秘密做完諮詢，公開點都要真誠咁問返各持份者。 

　　今次橫洲事件，梁振英一干人等，索性連做樣都唔做吓，而且係按照摸完底嘅結果大幅更改計劃。「摸底」呢兩個字，就此引起各樣聯想，猶如一個色魔干犯緊非禮之罪，猶如涉貪商賈「摸酒杯底」試圖取得不義利益。究竟「摸底」背後有冇利益輸送之嫌？橫洲棕地地主曾樹和2013年率眾為梁振英撐場，以至之後政府突然批准屏山丁地發展，凡此種種有冇關聯？

　　有人指責朱凱廸乘機作亂，將土地議題「政治化」，順勢倒梁，但都係嗰句啦，「若要人不知，除非己莫為」，梁振英意圖使出拿手絕招：推比人，但係佢嘅下屬、潛在對手、劍擊高手曾俊華一劍還擊，不惜同大家講，「其實我係嗰個小組，但我冇開過會架，我乜都唔知架」，更強調佢領導嘅土地供應督導委員會，並沒有決定要將橫洲發展分期進行。沒有分期，只有分歧，借勢將兩人之間嘅嫌隙浮面，連林鄭亦都加入戰場做花生軍師，聲明自己並非兩人旗下小組同委員會嘅成員，撇清關係。

　　以往大家見慣嘅權鬥，通常係話俾公眾聽自己爭取咗啲咩，人哋爭取唔到啲咩。多謝「三巨頭」示範呢種權鬥新模式，鬥推波，話俾大家聽「嗱呢啲決定都唔係我做架」。除咗因為特首選戰，我認為更加係因為梁振英推出嚟呢個波，係一個真·燙手山芋，因為涉及潛在嘅利益輸送疑雲，唔能夠排除有人用土地權益，換取選票，講緊嘅係一宗潛在弊案，值得執法部門追查。

　　呢個亦都係朱凱廸點解咁強調要打擊「官商鄉黑」勾結，因為特首選舉結果由1200人去決定，當中四大界別嘅設計，令到想沾手呢個職位嘅人，要向權貴傾斜。呢個不民主嘅制度，就係今日香港有人可以涉嫌濫權瀆職嘅核心原因，一日係呢千二人去落決定，無論佢哋係選委會，定係提委會，都唔能夠做到公平公正。呢樣嘢已經講到好臭，我都唔明點解到而家北京仍然唔明白，今時今日呢隻怪獸，係你哋養出嚟。 

　　今日下晝呢一場記者會，披露到啲咩固然重要，但重要性係在於呢兩日梁振英如何扭盡六壬，壓住曾俊華等人喺政府內部對佢所做嘅反抗。我唔預期會有反枱情節，畢竟出得嚟開記招，已經係傾掂好數，因為過去幾日嘅事，已經係發生咗，政府內部文件都已經洩漏咗出去，就睇你哋重點樣玩語言偽術。如果曾梁二人喺鏡頭面前搭膊頭，你會唔會信佢哋真係friend返？下一個戰場，係立法會肯唔肯動用權力及特權法去調查呢單「橫洲事變」，否則唔能夠真正推動整個已經爛透嘅制度，行返去一條正軌。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情