由踏入2016年嗰刻開始，對全世界嚟講，似乎已經註定咗係好差嘅一年，戰亂頻仍、信任歸零，奧運原屬喜慶事，應該可以沖淡一下戾氣，但老實講，連主辦國巴西都未搞掂好自己，寨卡未決、燥動不斷，身邊所有人都覺得，今年係冇乜奧運會嘅氣氛。吓，乜原來開幕咗嗱？唔止一次聽到身邊人咁講。 喺呢個咁差嘅氛圍下，都總算順利開幕。香港呢個小城，都因為奧運，起咗啲波瀾。

 

　　想講段故仔先。1984年洛杉磯奧運，中國喺49年後首次派出full team上陣，之前曾經部分參與，但一直都「失咗個金牌」。當時年僅27歲嘅射擊運動員許海峰，喺奧運揭幕後第一場參事就嬴咗金牌，一舉打破埋中國隊金牌零的突破。

　　

　　可能就係因為咁，大家都覺得，以下講嘅呢樣嘢，係老馮嘅，唔使思考嘅。里約奧運第一日，中國喺氣槍項目失利，唔小心跌咗塊金牌。最鍾意乜都推手機push alert嘅部分香港媒體，有唔少個標題都用類似「中國失奧運第一金」。

 

　　「失」第一金，意味呢一堆編輯當時諗法，係塊金牌本身就係屬於中國，永遠都屬於中國。許海峰以前接受訪問時，講咗一句嘢，直接插落去呢班「大中國膠」嘅心坎裡面，佢話，只係由於射擊項目較早舉行，佢先至能夠有此美譽。所以話，所謂「第一金」係先後次序問題，如果突然間有一年，奧運主辦單位決定田徑項目擺喺開頭，碰巧呢樣就係中國嘅弱項，咁大台係咪每屆奧運都要擺定「失奧運第一金」呢句喺度？係咪奧委會或主辦方有心令你冇咗呢塊「第一金」？咁人哋係咪要道歉？ 

 

　　我見到嘅係，用呢個字係源自大家對「開齋」有種情意結，好似只要嗰樣嘢唔係你開佢齋，你就係食緊二手飯，變咗雞肋，食而無味棄之可惜，呢種原本大家以為只應該出現喺央視嘅心態，已經植根咗喺呢個城市。

 

　　呢條題，如果用「失落」嘅話，成件事就截然不同，合常理亦都合中文文法，只不過，即使咁，呢種寫法仍然係有啲自大。數返許海峰攞金牌嗰屆開始，撇除埋2000悉尼奧運同樣發生過一樣情況，都係得6屆係首金由中國包辦。不過我又唔係選舉主任，冇讀心神器，點會估到當刻一眾行家係點樣諗「失」呢個字嘅用法呢？

 

　　其實唔係剩係某大台咁樣做，但係佢受晒靶，我覺得咁樣唔公道，要批評就批評晒全行呢種「大中國膠」嘅現象，某幾份大報，都有用「失金」，有一份直情喺中國攞到佢哋自己嘅第一金之後，寫上「鬆口氣」嘅字眼。其實關我哋咩事？個金都遲早出現，有咩咁緊張要HOLD住啖氣攞到金牌先鬆？

　　

　　經典例子點可以走漏，12年前世界盃外圍賽分組賽，香港對中國大戰，門將范俊業盡責擋出鄭智嘅十二碼，亦因為咁樣，中國比科威特得失球差差一球出局，第二日某份報紙大字標題「范俊業逞強」令中國出局，講到佢係罪人咁款，完美演譯一國大於兩制嘅面貌。到今年奧運，大台淡薄港隊比賽，羽毛球賽事播三分鐘當播咗、連埋原本應該免費播出嘅各種運動項目，可以全部都係播緊中國隊嘅賽事，港隊卻撥唔出airtime咁樣，凡此種種，都係令到香港人思考，究竟佢哋係咪重係屬於香港人嘅媒體？

 

　　今屆另一個焦點，係新世界皇帝孫楊面臨集體恥笑，香港都笑埋一份。學者劉兆佳話，香港人取笑、揶揄中國運動員，係會令到一國兩制將來實行有障礙。其實喺同一晚，有唔少人都讚賞同熱愛中國女泳手傅園慧，喺得到銅牌之後流露出真摯嘅喜悅同埋傻氣，唔知劉兆佳睇到，又會唔會對一國兩制嘅前途充滿返希望呢？如果笑一笑佢哋啲運動員，香港就唔行得一國兩制嘅話，咁唔怪得大家諗住想行另一條路啦。

 

　　我就覺得，其他國家或者其他隊伍究竟表現成點，我都係當睇表演、或者係欣賞競技嘅心態。我唔係因為孫楊乞人憎、因為大陸隊伍橫行，所以先批評香港部分傳媒嘅偏頗，而係因為我最著緊嘅始終係屬於我哋香港人嘅香港隊，但係喺免費嘅渠道，屬於我哋嘅嘢，係得唔到重視。

 

　　喺呢度，我想借少少版位羅列返港隊今屆嘅叻叻成績，同埋剩餘嘅賽程，希望真正嘅香港人，記住呢啲名字，未來繼續支持港隊，你輸，我陪你東山再起；你贏，我陪你君臨天下！

 

香港運動員今屆成績： (截至2016年8月10日香港時間早上10時)

 

1.乒乓球：

李皓晴 – 女子單打 十六強 止步 

杜凱琹 – 女子單打 十六強止步

黃鎮廷 – 男子單打 十六強止步

唐鵬 – 男子單打 三十二強止步

杜凱琹、李皓晴、帖雅娜 – 女團 8月13日出戰

何鈞傑、唐鵬、黃鎮廷 – 男團 8月13日出戰

 

2.游泳：

何詩蓓 – 女子200米自由式 十六強止步 (港隊歷來最高) 、女子200米個人混合式 預賽棄權

江忞懿 – 女子100米蛙式 三十二強止步、女子200米蛙式 8月11日出戰

鄭莉梅 – 女子50米自由式 8月13日出戰、女子100米自由式  8月11日出戰、女子200米自由式 三十二強止步

劉彥恩 – 女子100米背泳 三十二強止步、女子200米背泳 8月12日出戰

鄭莉梅、江忞懿、歐鎧淳、施幸余 – 女子4X100米混合式接力  8月13日出戰

謝旻樹 – 男子50米自由式 8月12日出戰

 

3.單車：

張敬樂 – 男子公路賽 DNF

李慧詩 – 女子競速賽 8月15日出戰、女子凱林賽8月13日出戰

梁峻榮 – 男子全能賽 8月15日出戰

刁小娟 – 女子全能賽 8月16日出戰

陳振興 – 男子越野賽 8月21日出戰

 

4.滑浪風舤：

鄭俊樑 – 男子RS:X賽 第六場 第六位 (比賽進行中，尚餘七場)

盧善琳 – 女子RS:X賽 第六場 第十九位 (比賽進行中，尚餘七場)

 

5.賽艇：

趙顯臻、鄧超萌 – 男子輕量級雙人雙槳 復活賽止步 (尚餘8月11日名次賽)

李嘉文、李婉賢 – 女子輕量級雙人雙槳 復活賽止步 (尚餘8月11日名次賽)

 

6.羽毛球：

胡贇 – 男子單打 分組賽 8月13日出戰

伍家朗 – 男子單打 分組賽 8月11日出戰

葉姵延 – 女子單打 分組賽 8月12日出戰

潘樂恩、謝影雪 – 女子雙打 分組賽 8月11日出戰

李晉熙、周凱華 – 混合雙打 分組賽 8月11日出戰

 

7.劍擊：

張家朗 – 個人男子花劍 十六強止步 (港隊歷來最高)

江旻憓 – 個人女子重劍 十六強止步 (港隊歷來最高)

連寶香 – 個人女子花劍 三十二強 8月10日出戰

 

8.田徑

陳銘泰 – 男子跳遠資格賽 8月13日出戰

姚潔貞 – 女子馬拉松決賽 8月14日出戰

 

9.高爾夫球

陳芷澄 – 女子淘汰賽 8月17日出戰

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】9歲泳手一度被拒參賽，議員指泳總執委會長兼任上訴委會長欠公正► 立即投票