19/05/2016
房中有鏡 可以攞命!
鏡子的重要性,可以提升至國家層面!
最近爆出英女皇批評中方無禮的風波,事緣習近平去年訪英,表面上金光燦爛,實則大家都不爽。
英女皇最近巧遇當時負責保安的女警官,一時忘記攝影機還開動,便衝口而出:
“Oh , bad luck !”(真係黑!)
旁邊的宮務大臣踩多一腳,話女警俾中國人玩殘(“seriously , seriously undermined by the Chinese”)。
白金漢宮內部也被玩殘,習氏伉儷下榻宮內比利時套房,是英女皇新婚時的居所,後來一直用來招待各國元首,應該好good luck㗎。
點知傳聞話中方唔多like 此房嘅風水格局,想重新部署,例如移走名畫和鏡子等。
談到鏡子,在風水學而言,又真可以是 bad luck喎!睡房有鏡,尤其是對正張床,被視為不吉,從心理學角度而言,你夜晚瞓到烏吓烏吓,爬起床見到個披頭散髮嘅自己,好容易以為貞子出動,嚇餐死!
咁女主人要對鏡描容,點呢?有些梳妝枱的鏡可以掩上,用時才打開,最為合適。又如果是鑲實的大鏡,不用時可以用塊靚布冚住,這樣便不會影響睡眠了。
有位朋友的老公最愛古鏡,成屋都係,一次他無端端大病,入咗ICU,太太除咗搵醫生,又搵風水師,後者到睡房一check,發覺有一面落地西方古鏡,他立即告訴女主人:
「塊鏡有古怪,當我走近時,原本牢固鑲實嘅鏡竟然震咗兩震。」
他還說鏡中藏了鬼魂,是女的。最終雖然丟掉大鏡,男主人已回天乏術。雖然兩者可能全無關係,但古雅輝煌的古董鏡內,唔知有冇「餡」,最好唔好放睡房啦!
不過鏡子有時又可以放大好磁場喎,例如窗外有靚靚招財水局,若在屋內適當位置放鏡,實行「吸水大法」,將美景與財運一併攝入屋中,財來就我,good fit 哂!
如果你唔知鏡子會成局還是敗局,就搵個風水先生睇吓啦,無謂好似英女皇咁話:bad luck,唔黑囉嚟黑!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票