男人飛老婆，除了中六合彩或中小三魔咒之外，其原因大致是對太太忍無可忍。曾有位日本婚姻專家高草木陽光（個名又幾有意境，簡直風光明媚）列舉為人妻者的十大惡行：

　　1.浴後在屋內裸行（女人都應該有自知之明，若發覺自己三圍已經自由行，會嚇親丈夫；若維修得好，又「辣」親丈夫，令佢血脈沸騰，如果你唔合作，佢嘅生理結構會令佢想捏死你！有冇聽過先撩者賤吖？）

　　2.如廁不關門（大小二便有甚麼好表演的？何必令自己變成臭女人呢？）

　　3.在老公面前脫腿毛（女版飛毛腿！）

　　4.醉後發瘋（男人都怕女人失控，幾冇面子！自己失控另計。）

　　5.不斷增磅（貨不對版，真想退貨！）

　　6.公然放屁、打嗝（有個老公向我投訴老婆放屁，指責佢由屋頭行到屋尾，砰！砰！砰……一連放了十個響屁，面不改容，還說響屁不臭！）

　　7.日日著同一套運動服裝，又無所事事（運動裝係好難著嘅，除非你青春煥發，否則師奶之極！）

　　8.不做家務（老公本以為娶了個人肉洗衣機、吸塵機、攪拌機……誰料要佢做亞四！）

　　9.打鼻鼾（這是男人的專利。）

　　10.產子時要老公在場打氣（佢都嚇到半死，分分鐘要急救嗰個係佢！）

　　綜合以上十戒，不外是婚前嬌滴滴的女神淪落成懶女人、臭女人、神經女人、烏where女人……等

　　世界有兩極，另一極的女人則非常奮發，有位女朋友每天化妝得明媚亮麗，絕不肯素顏示人，每天比老公早起、晚睡，意志力無比堅強！

　　你可能問：使唔使咁緊張呀！

　　認識一位青春版艷妝人，她和男朋友拍了半年拖，從來未在他面前卸過妝，誰料一次露營，給男友看了她的真面目，出營後即勞燕分飛！所以靚太堅守美妝底線，係有道理嘅！

　　話說另一極端的烏where女人有甚麼徵兆呢？

　　本性pair pair地嘅女人就算在關鍵時刻執到正，還是會在身體語言上露底的。第一是勁秋外八字腳，前面看像隻鴨，後面看像孕婦。第二是此類人多不會腰背板直，她們坐時攤在梳化、企時憑住條柱，好似麻包袋裝薯仔，完全冇紀律，冇線條！

　　呢個世界，男人當自強，女人宜自重。