新一代智能身份證今日開始有得換，Jenny聽講新證襟用啲、仲有勁啲嘅防偽特徵同晶片，其實喺上個月26日已經推出咗㗎喇！而今日就係換證計劃時間表開始嘅第一日，全民換證，正式啟動！

助理處長教大家影靚靚證件相

　　但係Jenny最關心都係一路以嚟都好難影到張靚靚證件相，而且又冇得P圖，點先可以照得好睇呀？入境事務處助理處長今日就親自教路，原來首先要唔好學IG女神，應該著返件有領衫，咁樣影出嚟嘅輪廓係會靚啲㗎！亦都唔好遮到個樣同埋化太濃妝，同埋唔好戴有色大眼仔呀！助理處長仲話，身份證張相可以影到你滿意為止，Jenny已經聯想到，到時各位Lady應該冇1個鐘都出唔到嚟……

第一批換證係85同86年出世嘅人？非也！

　　不過第一批有得換嘅就唔係我哋呢啲平民，而係特首、主要官員、行政及立法兩會議員、入境事務隊成員、警務人員及勞工督察等，下個月21號就開始畀市民換，首批係1985至1986年出世嘅市民，至於其他市民幾時有得換？睇下圖就知喇！

　　至於呢排滿11歲同埋18歲、因遺失或損壞要換身份證嘅市民，其實上月底開始已經可以換到新嘅智能身份證。截至今個月24號，入境處都已經發出咗1.7萬張新身份證，所以1985至1986年出世嘅朋友，嚴格嚟講其實都唔算係第一批換身份證嘅市民嚕！而最遲換身份證嘅，就係1954年之前出世嘅公公婆婆們啦，佢哋要等到2022年左右先有得換，如果屋企有老人家嘅，就記得4年後陪佢哋齊齊去換證喇！