聖誕快樂！唔知大家收到咩禮物呢？又或者準備假期睇邊套戲呢?而正忙於《財政預算案》諮詢工作的財政司司長陳茂波（波叔）就整咗段宣傳短片趁聖誕檔期推出喇！財爺拍片宣傳唔係咩新鮮事，今次「當波叔遇上波」又有咩新Idea呢？原來係玩「食字」，落區「接波」！嗱！波就接咗，唔好臨門撻Q呀！

聖誕檔期出新片「好波」

　　話說波叔月頭開咗個新專頁，有張圖喺波上Key嘅「親愛的波波」，又一副拍緊片嘅樣，大家都好想睇佢搞邊科。短片較啱時間，聖誕檔期出，Jenny估應該就係貪有兩日假期，大家會多啲時間上吓網、睇下片，收視率自然就好啲。

　　講返條片先，為咗表現波叔願意落區聽意見，當然要有街坊街里出鏡啦！片段入面個個街坊都拎著個波，上面印咗「19-20年度財政預算案」，好彩唔係準備掟出去，係講完心願就交個波比波叔，等佢「接波」！

波叔「接波」 咪再射錯

　　等Jenny睇下街坊有咩講先！當然唔少得希望政府搞好經濟、創造更多就業機會；至於打工仔希望提高個人免稅額；老婆婆就想起多啲老人院同醫院；一對父女就想政府起多啲「綠置居」幫佢哋上樓……

　　話晒今年香港財政儲備創歷史新高，庫房水浸之下，波叔而家有「波」響手，就要真係做嘢啦！等唔同階層多多少少都受惠一下，唔好再唔知射咗去邊，又或者射錯邊喇！

　　唉，講開又講，Jenny心心念念嘅「補漏拾遺」派錢4000，到而家新一份《財政預算案》都嚟緊喇！仲係無影……本來諗住幫補吓新一年去旅行嘛！