26/10/2018
內地開拍《大橋》 結局應該唔會BBQ
Jenny體驗完港珠澳大橋通車一日遊之後,今日就聽到一個新消息,就係內地將會拍返套電視劇叫《大橋》賀一賀佢噃!聽聞會集合中港澳明星齊齊演出,係大製作嚟!
內地金牌編劇收山之作
呢個消息喺內地網站廣為流傳,連海報都有埋啦!睇嚟都幾堅!消息話,呢套劇係由嗰邊嘅「金牌編劇」陸天明操刀,聽講寫咗兩年㗎啦,仲號稱係佢嘅收山之作添!叫得金牌編劇,斷估最尾唔會喺人工島上面BBQ就大結局嘅!
Jenny即刻查下廣電總局,發現又真係出咗「電視劇拍攝製作備案公示表」,有埋劇情添!話說有個年青有為嘅後生仔,想起座「橫跨香港、澳門、珠海的跨海大橋」,去到「人到中年」就真係做咗呢條橋嘅總工程師,不過就因「中國在此領域的技術空白,面對國外同行開出天價的諮詢費」,所以要「自主創新」,最後梗係成功咗啦!Jenny見到連主角名都起埋喇,仲係港人熟悉的名字--「林峰」添吖!
真.林峯會唔會有份?
至於套劇有啲咩人拍?Sorry,暫時係未知住嘅,不過《新華社》就話有「老中青頂級演員陣容激情飆戲,以及香港、澳門眾多明星傾情加盟」咁威威啦!計起上嚟,「真.林峯」都符合條件呀,唔知會唔會考慮下咁呢?
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇