24/10/2018
橋上老友記High到跳舞 橋下白海豚影都無
上次同大家搶先睇咗港珠澳大橋香港段,今日卒之有得親身體驗搭車過晒成條橋喇!Jenny梗係要第一日就去試試佢啦!小妹仲搜羅到幾種方法都可以經港珠澳大橋去珠海同澳門,所以今次又繼續跟實同事,齊齊整個港珠澳一日遊先!
過關超快,唔使排隊!10秒搞掂!
老友記極興奮 影相影到畀司機鬧
不過,唔知係唔係開通日係平日,一眾打工仔女請唔到假,所以Jenny坐嘅俗稱「金巴」嘅穿梭巴士,都係半滿,而且同車嘅盡是有返咁上下年紀嘅叔叔伯伯,亦都有啲姨姨嬸嬸咁囉!大家都好興奮咁攞起自己嘅手機,出盡力同條大橋自拍,更有人衝到車頭,實行「影大橋,影到盡」!結果就梗係被司機大佬鬧啦!
影相、影相、影相!
太多人堆上車頭影相,搞到司機大佬嬲豬了。
而小妹同事搭嘅直通巴,就聽講坐到九成滿噃!唔通係因為首四班經港珠澳大橋嘅直通巴有紀念品送之故?不過聞說車上乘客都一樣係叔叔伯伯居多,自拍同影大橋當然走唔甩!簡直係開Party 咁Feel!
買「金巴」飛好easy!
「金巴」中途死火 白海豚緣慳一面
政府話開通初期有交通管制,唔畀咁多車上橋住,唔怪得小妹沿途所見就只得旅遊巴、穿梭巴、旅遊巴、穿梭巴、旅遊巴、穿梭巴....冇乜見私家車喺橋面!
呢條55公里嘅港珠澳大橋話晒橫跨成個海面,周圍風景就梗係一片大海喇!你可以話都幾relax,不過計小妹話就悶咗啲囉......望望下海,腦入面就響起梅姐首本名曲《似水流年》嘅歌詞:「望著海一片......」喺呢個時候,竟然見到對面線有架「金巴」係半路中途死火,不過可惜車速太快,小妹未嚟得切舉起部手機影低,事發現場已經消失視線中.....
見到指示牌就記得望實個海喇!
喺條橋行左20幾分鐘左右,小妹就見到有個指示牌寫住「中華白海豚保護區」,即刻金晴火眼望實個海,不過今日除咗天色唔多好之外,小妹嘅運氣都唔多好,同珍貴嘅中華白海豚緣慳一面......
溫馨提示:大橋隧道前換電話卡
行完成條港珠澳大橋需時都係37分鐘左右,計埋全程由欣澳到澳門都係74分鐘,小妹就覺得如果係住東涌青衣荃灣嘅讀者可以一戰,市區嘅朋友其實搭船都係差唔多時間,仲唔使特登入東涌添!
畀個溫馨提示大家,記得喺巴士落到大橋隧道嗰陣就好換定電話卡,因為一出就已經喺中國水域,唔少電話都已經轉咗內地訊號,有行家唔記得換,就白白被收漫遊費喇!
高鐵西九龍站嘅中港分界就喺地下,港珠澳大橋珠澳分界就係個天?(左方:珠海口岸,右方:澳門口岸)
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票