09/10/2018
月娥繼續喜歡藍 《施政報告》封面提早曝光
新一份《施政報告》聽日(10日)就出爐喇!Jenny同各位行家都已經做好聽日要全日踩行油嘅準備,而特首林鄭似乎都已經整裝待發,今日凌晨仲特登喺Facebook Post咗條新片,同大家講已經準備好份《施政報告》,片尾仲有彩蛋添吖!
凌晨出片「大功告成」!
曾經被老公埋怨凌晨兩點仲喺到做嘢嘅林鄭,今次選擇凌晨出片,可見林生所言非虛!片中除咗Show佢呢幾個月做諮詢會嘅相同少少片段之外,仲喺片尾加多張「埋頭苦幹」同埋「大功告成」嘅伸懶腰相,唔知係唔係想話畀大家知佢呢排為咗《施政報告》捱到通頂呢?Jenny覺得咁係唔得㗎!捱夜係女人嘅大忌嚟㗎嘛!
《施政報告》星期三出,不過逢星期二林鄭都要喺開行政會議前見記者扑個咪。小妹記起上年林鄭就係喺扑咪嘅時候,趁大家唔注意嘅拎咗份第二日發表嘅《施政報告》Show咗下,有啲行家都未影得切相,連小妹都差啲中伏!而今年林鄭又「故技重施」,喺報告出爐前一日畀個封面畀大家先睹為快。好彩Jenny有咗上年嘅「經驗」之後,今年就識得舉定定部機影相喇!但係又係藍色封面嘅?唔通林鄭拎錯上年嗰份?
林生所言非虛,林鄭凌晨喺Facebook Post咗條新片,同大家講已經準備好份《施政報告》。
藍封面依舊 內容有睇頭?
林鄭都估到大家有呢個疑問,自動波咁話:「大家好似會覺得呢份係唔係就係舊年嗰份,其實(封面)係一模一樣,所以都冇乜好影。哈,除咗由2017改做2018!」此言差矣呀林太,只要係你拎住,乜都係有必要影㗎!何況係2018年嘅《施政報告》!內容有新意比較重要啊!
只不過,今次《施政報告》封面又用返上年嘅設計、今日條片又剪得幾「簡約」下,睇嚟林鄭喺Design呢一瓣都慳唔少!咁又係嘅,今年政府話要填海嘛!大Project要唔少錢啊,一填就預計要用半個庫房儲備,都係時候要慳啲使喇!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票