12/10/2018
D定唔D?等足11日劉小麗最後難逃被「D」命運
立法會九龍西補選嘅提名期下星期一(15日)就截止,不過一直好驚會被政府取消參選資格(DQ)嘅劉小麗,一如傳聞到晚上就真係被DQ了。所以今日作為佢嘅Plan B嘅工黨李卓人,都咋咋臨去九龍城政府合署報咗名先!
選舉主任今次做OT Fighter!
小麗一直到傍晚都未收到選舉主任嘅查詢或者確認,點知到晚上7點左右,選舉主任就工都唔放,都要畀封DQ信佢。Jenny睇返今年年頭嘅補選,同為DQ主角之一嘅姚松炎,都係提名期最後一日先獲確認參選資格,不過當時佢並唔係提名期開始嘅第一日就報名,而係第4日先去報名嘅。按照呢個速度,今次一開波第一日就報名嘅劉小麗,大家都估應該呢兩日會通知入唔入到閘,但等到政府部門放工時間,都冇咩聲氣,大家都以為星期一先有結果,原來選舉主任今次唔做Deadline Fighter,做OT Fighter!
阿人大安旨意唔怕被「D」
今次選舉主任又係問都唔問,情況就好似上次港島區嘅周庭咁,解釋都費事聽,一嘢就DQ咗小麗。當時被視為周庭Plan B嘅區諾軒雖然迅速補位,但係報名同埋競選時都有意無意咁話自己同周庭唔同;但今次作為劉小麗親自挑選嘅Plan B,李卓人報名嗰陣都有劉小麗傍住,同區諾軒當日報名同埋競選時玩法唔同噃!睇嚟阿人都幾大安旨意政府唔會DQ佢呢種溫和反對派!Jenny祝阿人好運喇 !
循例都提提大家,而家報咗名嘅仲有馮檢基、陳凱欣。如果阿人冇事,睇嚟今次補選就會係兩男一女「嬲」字格局嚕!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票