13/08/2018
林鄭終「放下包袱」星期五fb開Live傾《施政報告》
特首林鄭玩Facebook都叫做有差唔多1年半經驗,不過Jenny印象中,林鄭仲有一個Facebook功能係未用過嘅,就係開Live喇!
星期五8點約定你!
你知啦!事先拍條片再擺上網,同開Live直播立即回應大家嘅問題,點都有分別嘅!今日林鄭就聽到大家嘅「願望」,同大家講,今個星期五(17日)夜晚8點會做個Facebook Live,話希望親自聽吓大家對今年《施政報告》嘅意見喎!
其實林鄭喺參選時先學玩Facebook,雖然比其他人慢,但都叫肯踏出第一步,佢啱啱開咗專頁冇耐嗰陣,仲話好願意用Facebook Live同市民直接溝通添!而當佢第一份《施政報告》出爐時,都有講過話想開Facebook Live嚟回應市民問題。
睇唔到Live都可事先留言
Jenny都覺得呢個做法就最能體現林鄭成日掛喺口邊嘅「新思維」喇!本來滿心期待,可惜林鄭之後就話,嗰陣時有同事對開Live「有保留」,所以最後都係冇搞到。不過,以Jenny了解嘅林鄭,想做嘅事就一定會搵辦法去做到,今年佢「捲土重來」,唔知係因為嗰位同事已經準備好、定係已經搵到準備好嘅同事呢?
Anyway,林鄭仲同大家講,如果嗰晚唔得閒都唔緊要,可以「預先喺呢個Post度留言,當晚除咗即場交流,我都會抽部分留言出嚟回應!」照顧埋唔得閒睇Live嘅市民!所以大家如果有嘢想講、有嘢想問,就快啲去留言啦,Jenny估林鄭見到大家「炸爆」自己個Facebook,一定會好開心市民反應咁熱烈!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【驚恐症來襲】無預警發作...患者親身講述得病經歷及康復過程!必要時自己做一件事可幫到手!► 即睇