今日係新民黨容海恩（Eunice）嘅大喜日子！雖然Eunice一直都冇講過佢男朋友仔個名，但係次次提到佢哋黨嘅政策總裁袁彌昌（Derek）嗰時都會低頭甜笑，戀情都未正式公開，兩位轉個頭已經結咗婚喇！

你睇Eunice笑得甜到呢!(容海恩提供)

　　Eunice同Derek喺舊年被傳拍拖，去到上個月尾突然話結婚，仲有指係「雙喜臨門」奉子成婚，速度之快令到大家咋舌！Jenny上星期喺政總見到Eunice嘅時候，就覺得佢「孕味」唔算濃，不過都留意到佢著咗對低踭黑鞋，幾安全咁噃！相信是真是假，呢幾個月就會知！ 

雖然低調一樣識做 斗零踭上落無難度

　　之前Eunice就話想低調啲，只係會搞個小型婚宴，邀請相熟嘅親友同埋政界人士出席。不過Eunice身為立法會第一個任內結婚（甚至生B）嘅女議員，一眾行家（包括Jenny）又點會放過佢呢？Eunice同Derek都深明呢個道理，所以就喺中午蒲一蒲頭，同大家打個招呼先！免得行家們冇得交差嘛！

　　Eunice今日一身純白絹面婚紗，踩住4吋斗零踭，仲要行樓梯，Jenny見到都覺得牙煙，老公Derek當然都有同感，即刻出手扶實老婆！雖然新婚燕爾，Eunice都係要呻一呻「原來結婚好忙，無諗過有咁多嘢搞！」係唔係因為籌備得太急？Eunice就話唔係喎！咁係唔係有BB呀？未等Eunice答，Derek就即刻話有好消息就會話畀大家知，仲話「我哋都想」喎！

(葉劉淑儀facebook)

葉劉送禮夠實際 應該好快有得抱「孫仔」

　　一對新人唔講「BB」，連作為姐妹之一嘅工聯會麥美娟（Alice）陪Eunice媽媽見記者嗰陣，都一樣守口如瓶，Eunice媽淨係話「唔清楚」，Alice就即話「今日只係講結婚，Auntie嫁女好開心」，大家都好識做呀吓！

　　愛徒結婚，身為佢師傅嘅葉劉嘅心情應該都好似嫁女咁！佢就非常實際，送咗銀行禮券做賀禮，等一對新人鍾意買乜就買乜，又祝Eunice同Derek「早生貴子」！既然一對新人都話「想」，相信好快就有好消息話畀師傅聽嘅啫！

(容海恩提供)

(葉劉淑儀facebook)