16/07/2018
書展又到喇 建制出書得程介南做代表?
暑假重頭戲--書展又到,各位又係時候用一星期嘅時間入晒一年要睇嘅貨喇!小妹知道唔少政界人物年年都會趁書展發表吓自己嘅新作嘅!Jenny估今年最矚目嘅都非自稱「政壇李克勤」嘅馮檢基(基哥)莫屬喇!事關佢今年本新書係回顧返呢幾十年嘅政治生涯,仲講到明會大爆喺民主派嘅血淚史(屎?),更包括埋今年初選嗰陣「屈基事件」嘅內幕。喺新書發布之前,基哥仲宣布埋退出佢經營多年嘅民協!呢個深水炸彈一拋落嚟,相信都幫基哥Cap到唔少「水」!
準備好彈藥未?
黃之鋒出書談獄中生活 程介南寫書教煮餸
而今年年頭終極上訴成功嘅「雙學三子」,其中「兩子」羅冠聰、黃之鋒都有出書。羅冠聰未上訴成功之前,已經透露過想寫書嚟紀錄低呢幾年嘅心路歷程;而黃之鋒就已經係出到第三本書,今次就係講坐監時嘅所見所聞、所思所想。
Jenny亦都知道,前民建聯立法會議員程介南都一樣有出新書,講明係講「熱廚房」,不過呢個「熱廚房」係「真.熱廚房」,並唔係講政府!雖然係教煮餸,但係都請到佢嘅前黨友曾鈺成幫手寫序言,仲爆料話程介南以前喺中學教書時,贏過教師烹飪比賽冠軍添!
鄺神失落年度作家
話時話,Jenny好記得上年貿發局定咗「旅遊」做主題嚟吸金吸人,而今年嘅吸金力相信都不遑多讓,因為今年個Topic係港女最愛嘅「愛情文學」呀!有留意嘅讀者應該會記得,身為立法會議員嘅民主黨鄺俊宇(鄺神),其真身係「香港MK愛情文學」代表,而且年年書展都會出新書,今年亦都唔例外!不過可惜今年食正佢嗰瓣,但年度作家名單仲係冇佢份,Jenny表示好失望呀!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》運動員強大心理質素如何煉成?張小倫分享最挫敗經歷,及後怎樣重整旗鼓?► 即睇