民協馮檢基（基哥）上月頭本身就約咗傳媒茶聚，話想講吓由佢新成立嘅民生政策平台，點知臨尾就放咗大家飛機，話有啲重要嘢未處理好，遲啲再約過大家喎！搞咗咁耐，基哥終於再約行家聽日見啦！

決心退出民協？

　　不過今次就唔係茶聚咁輕鬆喇！事關民協出咗採訪通知，條標題大大隻字咁寫明係｢民協與馮檢基就其去向」記者會，Jenny都估到一二；再睇埋內文，話「最近馮檢基撰書回顧過去40年的從政及社運經歷，刺激他思考自己未來在社運、在政治及在民協的角色及位置。馮檢基有感於過去壓力團體對政府施政具影響力，有意集中精力發展民間壓力團體。」講到咁明，基哥今次睇嚟真係下定決心退出民協喇！

　　不過如果基哥真係退黨，對民協嚟講都唔知係好消息定壞消息。事關近年基哥被人笑「永續參選」，唔畀啲機會班細嘅。就好似上次311補選時，就算黨內有何啟明想參選，基哥都仲係寧願自己上場，搞到連前主席莫嘉嫻都頂佢唔順，退黨「死諫」！如果基哥走咗，班細嘅起碼叫做唔使再被綁手綁腳；但係話晒基哥都係創黨成員，民協某程度都叫做靠基哥起家，難聽啲講句，講起民協，除咗馮檢基都冇乜幾個係噏得出名。

冇咗Icon選舉路難行

　　冇咗基哥呢個Icon，民協以後嘅選舉路睇嚟都唔易行。加上民協一直以西九啲老區做巢，唔少老街坊都好愛基哥㗎！如果今次民協處理得唔好，啲街坊以為班細嘅好似上次自決派咁係逼走基哥，勢必流失大量票源！真係成也馮檢基，敗也馮檢基！Jenny今晚真係要儲足精神，聽日睇民協點拆喇！

　　另外，聽講基哥仲會喺書展出書，大爆佢喺政界呢幾十年嘅經歷，仲有唔少民主派內幕同埋不滿嘅故仔！Jenny表示好期待呢粒大花生呀！