16/03/2018
林鄭「成功爭取」老公繼續潛水
民建聯(民記)最叻「成功爭取」就全人類都知!估唔到連特首林鄭都要「成功爭取」?講緊就係佢今日去咗花卉展覽嘅開幕典禮!是咁的,今日個展覽就請咗林鄭致辭,林鄭就話,自己一直都好鍾意去花展,但係一直都冇機會做開幕嘅主禮嘉賓,佢今日就「成功爭取」(係Direct Quote!)到嚟主禮喇!
女人愛花好正常,即使係特首都唔例外。
點解特首去主持花展都要「成功爭取」呢?其實平時呢啲活動都係由行政長官夫人主持,不過係人都知林鄭係女人,只有丈夫冇夫人,而佢先生林兆波就一直都好低調,唔鍾意出鏡,所以林鄭就同林生講,不如由自己代替佢出席呢啲活動啦!林鄭仲話,林生聽到呢個建議都非常高興添!有得繼續潛水做學術研究,林鄭又可以嚟花展,皆大歡喜喇!
性別定形一早Out喇!
其實林鄭做咗特首之後,因為佢係第一個女特首,連外界要點稱呼配偶林兆波,政府行政署都要特登出通告教路,規定喺正式埸合要同時稱呼林鄭同佢丈夫時要叫「行政長官林鄭月娥女士及她的丈夫林兆波博士」,唔似得以前用「伉儷」兩個字就可以搞掂。而香港有啲制服團體都一直有慣例,邀請特首或者特首夫人做領袖,不過林鄭上場之後都出現咗疑問,究竟係搵林鄭做男童軍總領袖、林生做女童軍會會長,定係調轉返由林鄭做女童軍會會長、林生做男童軍總領袖呢?
不過,童軍總會好快就回應咗,因為會章冇講到總領袖嘅性別限制,只係話「邀請香港特別行政區行政長官出任總領袖一職」,所以林鄭就可以前所未有咁以女性身份做咗童軍總會嘅總領袖。而女童軍總會就麻煩啲,因為會章寫明要「總會會長應為香港特別行政區行政長官的夫人」,所以梁太就破例「冧莊」,做多5年喇!計Jenny話,其實呢個世界,唔係男人就係女人,「性別定形」呢家嘢一早摒棄咗喇!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇