立法會補選個結果都叫做塵埃落定，當中有人歡喜有人愁，但輸打贏要就盞出醜！Jenny噚日先見到工聯會王國興（MC興）第一個彈出嚟，話要協助一個港島居民司法覆核（JR）區諾軒個資格；今日就到泛民一方嘅「長洲覆核王」郭卓堅（堅叔）JR民建聯鄭泳舜嗰個，不過今次「長洲覆核王」冇法援，唯有自己出錢，但佢話有律師話肯義助佢。建制泛民都玩呢招，唔通真係執輸行頭慘過敗家？

兩位都畀人入稟JR，究竟法庭會受理邊一邊?定兩個都唔受理?

一於你J我又J 個個都要J！

　　嗱！建制嗰邊呢，據噚日MC興就話，區諾軒喺論壇度承認燒過《基本法》，仲唔排除做多次，話佢公然違反確認書喎！佢仲話，佢哋喺投票日前已經同過選舉主任同埋選管會主席馮驊投訴，但係冇回應，所以唔係「輸打贏要」喎！至於嗰位被協助嘅市民，Jenny幫大家查咗佢底勢喇！原來係「的士司機從業員總會」嘅秘書長黃大海，曾經喺佔領運動期間申請禁制令，又同佢阿哥獲邀出席過中聯辦嘅新春酒會。咁把炮，睇嚟邊個協助邊個都未知！難怪黃生非常豪氣咁話自己承擔啲訟費喇！

的哥大戰覆核王

　　至於泛民呢邊，叫得「長洲覆核王」，就知郭卓堅都真係幾堅，事關佢提過嘅JR前前後後都超過30次，例如前特首梁振英宣誓誓詞唔準確、「一地兩檢」違《基本法》等等，仲要經常都用法援JR政府，結果法援署要發命令，下令喺未來3年都唔受理任何佢提出關於JR嘅法援申請。所以阿堅叔今次要自掏荷包喇！不過Jenny就估堅叔其實都估到法庭未必受理，今次都係擺個姿態，實際上都唔會使太多錢。

　　今次「長洲覆核王」JR舜仔個資格，就話係因為舜仔個黨民建聯全名係「民主建港協進聯盟」，當中嘅「民主建港」包含咗獨立、想喺香港建國嘅意思，仲唔係違反《基本法》同憲法？咁諗落又唔係冇道理嘅，既然「民主自決」講緊自己決定未來都話係鼓吹獨立，咁「民主建港」字面上睇，就真係幾可圈可點噃！讀者們，你哋又點睇呢？